Jop biang ka kynhun NDA, ha ka elekshon MLA ha Bihar

New Delhi: Ka elekshon dorbar Jylla ha Bihar, ka la ai jop biang sha ka kynhun jong ka National Democratic Alliance (NDA).

Na ka jing niew vote haduh mynta, ka seng BJP dalade hi, ka la nang tam ha ki 75 tylli ki Constituency, katba ka JD (U), kaba dei ka seng kaba ialam ia ka sorkar bad kaba la khlieh da U Nitish Kumar, dang tam ha ki 41 tylli ki Constituency. Ka kynhun NDA, haba khein lang bad kiwei ki seng, ka la don ha ka jingbiang briew ba pura, ban thaw ia ka sorkar thymmai ha Bihar, namar ba ka la nang tam ha ki 121 tylli ki Constituency.

Ka Rashtriya Janata Dal (RJD), ka kynhun liang pyrshah, kaba la tip, da ka kyrteng mahagathbandhan, ka la nang tam nalade hi, ha ki 72 tylli ki Constituency, ka Congress 20 Constituency bad ka CPI ML ha ki 11 tylli ki Constituency bad haduh mynta katei ka kynhun liang pyrshah, ka la nang tam ha ki 113 tylli ki Constituency.