Bna nam na ki kbeit, ki briew ha Umru; ki im hapdeng ka jingsyier

Nongpoh:Ki nongkitkam ka Ribhoi Tourism and Environmental Development Forum (RBTEDF), ki la leit ban jngohkai halor ka jingwan ba shisien shi snem ki Kbeit Amur Falcon ha shnong Umru, ka shnong khappud ha Ri Bhoi ha ki thain Block-2 bad ha katei ka jingleit jngohkai jong ki, ki la pynpaw ia ka jingsngewkhia, namar wat haba katei ka shnong ka pawnam na ka jingwan ba shisien shi snem da ki Kbeit Amur Falcon, hynrei ka jingbym shimkhia ka sorkar ban weng ia ka jingeh, kaba la kynduh da ki paidbah katei ka thain halor ka jingiakajia pud, ka la wanrah ia ka jingduhnong kaba khraw na bynta ki paidbah ym tang kiba sah ha katei ka shnong, hynrei ha katei ka thain hi baroh kawei.

Hadien katei ka jingleit jngoh ia katei ka jaka, ki nongkitkam ka RBTEDF, ki la lap ba katei ka jaka ka don ia ka jingkyrmen kaba khraw eh ba kan long kum kawei na ki jaka jngohkai pyrthei ba pawnam, hynrei tang namar ki kam iakajia pud hapdeng ka Meghalaya-Assam, ka la pynlong ba baroh kitei ki sepei lut baroh.

Kitei ki nongialam ka RBTEDE, ki la iathuh ba ki briew kiba sah ha katei ka shnong ki im hapdeng ka jingrit mynsiem, namar ki shah pynwit palat ha ki bor pulit ka Assam, namar lada ki ioh ia kino kino ki kam pynroi (Development) na Block, ki la shah pynsahngeh ha ki bor pulit Assam lem bad kiwei ki jait bynriew, kiba sah ha katei ka jaka, wat haba katei ka jaka la sah khambun da ki Khasi.

Kumta kum ka seng kaba don ia ka jingthmu ban kyntiew ia ki kam jngohkai pyrthei hapoh ka District, ki kyrpad ia ka sorkar Meghalaya ba ka dei ban pynbeit noh mardor bad ban beh noh ia ki pulit Assam na katei ka jaka, namar ka jingdon ki pulit Assam ha katei ka jaka, ka la wanrah ia ka jingduhnong kaba khraw ia ka jylla, namar ia ka spah ka phew kaba ki paid Khasi ki dei ban ioh, hynrei la ioh knieh ei da kiba nabar.

Namarkata, haba iadei bad katei ka shnong kaba dei ruh ka shnong kaba la sdang ban pawnam na ka jingwan ba shisien shi snem da ki Kbeit Amur Falcon, na ka liang ka RBTEDE, ka kyntu ia ka sorkar jylla ba ka dei ban pyrkhat janai halor katei ka shnong, khnang ba kan long ka jingmyntoi kaba khraw ia ki paidbah ha katei ka shnong bad ka thain hi baroh kawei.