LANO PAT

P.B.S

LYNNONG – 1

Watla ngim lah ban iohi da u Blei markhmat da ka khmat briew jong ngi, hynrei ngin kynmaw ba ma ngi baroh ngi dei kiba shah thew ha u. U pynlong ia kiei kiei baroh da kaba shu hukum hynrei ia u briew u da thaw janai. Ha ka jingstad jong u bad ka bor maian, ngi iohi ia kane ka pyrthei kumne kumba ka long. Ym don riewstad ym don riewheh riewhain u ban stad bad ban kot ka jingshemphang ia ka plan jong u Blei.

La pynbynta ia u briew ha la ka jong ka jong, ka jong ka khyndew bah, ha la ka jong ka jong ka Ri, ha la ka jong ka jong ka jylla, ha la ka jong ka jong ka distrik, ha la ka jong ka jong ka thain bad ha la ka jong ka jong ka shnong.

Ia kane la leh na ka bynta ka jingbit jingbiang jong ki. Ki kren ha la ka jong ka jong ka ktien, ki don ha la ka jong ka jong ka rukom im, la ka jong ka jong ka deiti bad ka dustur. Ka rukom trei bad jingtrei ruh ka iapher kawei na kawei pat bad malu mala hangne hangtai ki iasyriem.

Na kitei ki jingiapher ngi sngewthuh thikna ba u Khynriam u don la ka rukom jingtrei, u pnar ruh la ka rukom jingtrei, u War ha la ka rukom jingtrei, u Bhoi ha la ka rukom jingtrei bad kumta ter ter ha la ki thain ki thain. Tang shu ong ki war ngi sngewthuh kumno ki trei, kumjuh ruh kiwei kiwei pat.

Hapdeng kita ki jingiapher, ka jingkiew stet ha ka jingim dei ka mynsiem ialeh jong man la uwei pa uwei u briew khlem da ai daw da kumwei pat. Haba bet yn sa ioh ot, haba kynshew yn sa dap bam, haba dap bam lait na ka ram. Ha lyndet ka jingtrei shitom don ka nong kaba khraw. Ha man la uwei pa uwei u briew u dei ban bsiap ia ka mynsiem iaksaid bad jingiakhun ha ka jingim. Namar ka jingim ka dei ka jingialeh bad ka jingim ka dei ka burom ban khein dew thala ka pynpohdor kylla.

U Bhalang u dei u khun baduk. U wan na ka longiing kaba duk bad ka im jynjar. U don shiphew ngut shipara. U hynmen bad ma u ki dei ki khun shynrang ba ha khmatduh bad phra ngut kiba bud ki dei ki kynthei suda. U Ksanbor, ka dei ka kyrteng u hynmen jong u. Ki kmie ki kpa jong ki ki shu im da kaba rep ha ka lum ba shu shim wai.

Kane ka longiing ka don ha kawei na ki shnong ba kyndong eh ha ki thain West Khasi Hills. Ban pyndap katta ki khun kam dei kaba suk. La shu bam madei mata tang ban im. Ki shu bam da u jhur ba thung hi ha ka shet syrwa plup plup. Kine ki khun pat ki sngaid ki plung hur hur syriem kumba long u Daniel ha ka khana na ka Baible. Kine ki khun rit rynjaw rynjaw bad haba la wan lei lei ka pang ka shitom la i synei hi khait. Ka iing ruh ka dei tang ka sem ba tap shiliang ba la ker skhem pat da ka lyntang snep. Ka kup ka sem jong ki ruh kaba shu kup bad phong katba ioh khlem wandur wandar ha ka rong sniehdoh kaba iapher hapdeng jong ki. Ka iing malu mala ha ka khapngiah lyngkrung lyngkrang ka kup ia ka dur ka jingbym i koit i khiah. Ki don ka phyllaw ka mynshem bad ka kper kaba heh. Ki thung da u jingthung kum u riewhadem, ki jhur ba bun jait ban tah ja miet ja step.

Kane ka shnong rit ka long kaba itynnad shibun. Shaphang shatei la ker da ka khlaw rit ha rynkat ki diengbah katto katne tylli. Shaphang mihngi la ker da kawei ka wahrit kaba baroh baroh ki nongshong shnong ki leit saitjain hangta. Kane ka wah ka long ruh ka lad kamai ia ki theilud thei iaw kiba saitjain iingbriew. Kane ka wah ka neh um baroh shisnem. Na ka bynta ban jingbhalang bad jingmyntoi lang, ka shnong ka la adong bym bit ban pom dieng ha shi lynter kane ka phud wah, ban bret jakhlia, ban khlong maw bad kumta ter ter. [yn dang bteng]