Bun kiba kha khun bad kiba iap hapdeng lynti naba bym don Health Centre ha ka thain Hingaria

Jowai: Ka KSU Hingaria Unit bad ka Southern Border Area Youth Welfare Association ka la dap da ka jingsngewkhia halor ka jingbymdon ka Sub-health Centre ha ka thain Hingaria kaba kynthup ia ki shnong kum ka Huroi, Lailong bad kiwei kiwei kiba ka jingbun briew ka la kot haduh kumba lai hajar ngut eiei.

Haba donkam jingsumar ki hap ban iaid kjat haduh 35 km eiei bad katta shaduh Bataw PHC ban ioh jingsumar. Kane ka jingeh kaba ki paidbah ka thain ki ia kynduh ka long namar byn don u surok lait noh ka surok khlaw kaba khohruh khohram bad kaba ktieh khatam ha ki por lyiur.

Ha katei ka thain wat ia ka mobile phone ruh ki paidbah ki hap ban pyndonkam da ka SIM Card bad Network kaba la ioh na ri Bangladesh bad bun kiba hap ban leit phah sumar sha Bangladesh namar ka khamjan sha katei ka ri bad sha ki jaka ai jingsumar ka jylla la jong na ka daw u surok, la pynpaw ki nongialam kitei ki ar seng.

Na ka liang kitei ki ar tylli ki seng kiba peit bad trei shitom na ka bynta ka bha ka miat jong u paidah ka thain ki la hap ban thoh ia ka shithi ban kyrpad na ka tnad ka koit ka khiah ka sorkar jylla lyngba u DH&MO ban kyrpad ban buh noh ia ka Sub-Health Centre ha katei ka thain khang ban iada ia ki paidbah na ka jingiap khlem dei por khamtam ia ki longkmie ba ar met kiba hap ban kha shiteng lynti ha ka por ba iarap paidbah ban pynpoi sha ki jaka ai jingsumar.

Ka KSU bad ka SBYWA ka la pynpaw ruh ba ki la don bun ki mynsiem ki ba la duh ha shiteng lynti.

Hooid ia utei u Surok Khlaw ba khohruh khohram la pyndonkam ruh da ki shipai iada khappud, ki BSF bad ia utei u surok la shimti da ka tnad PWD ka sorkar jylla ban shna hynrei ula sah kumjuh haduh kine ki sngi.

Ban poi sha katei ki shnong kiba don ha katei ka thain hap ban iaid na Sonapur lyngba u NH-06 bad lada ka surok ka bha kan iarap ruh ia ki paidbah ka thain ban iasoh ban kiwei pat ki shnong na kitei ki shnong kiba don ha East Jaintia HIlls bad ki shnong kiba don Ha West Jaintia Hills shaduh Muktapur bad Dawki bad kan long ka jingmyntoi ha ka liang ka ioh ka kot bad ka kamai kajih.