Pynmih hukum u DC, halor ka bai kit dewbilat ki Trok

Khliehriat:
U Deputy Commissioner ka West Jaintia Hills, mynta ka sngi u la pynmih ia ka hukum ha kaba iadei bad ka dor ha ka bai kit bai bah ki trok ban shalan ia ka Dewbilat na ki karkhana bapher bapher kiba don ha East Jaintia Hills.

Katkum katei ka hukum, la thoh shai ba ka dor kaba ka sorkar jylla ka la buh kan trei kam tang ia kito ki trok kiba pynpoi dewbilat na kitei ki karkhana sha ki jaka die kiba don tang hapoh ka jylla. Ki trok kiba shalan sha bar jylla, katei ka hukum jong ka sorkar kan nym treikam satia.

Ka dor ha kaba iadei bad kane ka long, na ka bynta ki kali heh (heavy) bad ki kali ba kham rit (Medium) kaba rit tam ka long ha ka dor 7 tyngka katba ka dor kaba heh tam ha ba iaid ha surok rong ka long 11 tyngka ha man ka shi kilometer.

Na ka bynta kito kiba iaid ha surok maw ka dor ka long 8 tyngka kaba rit tam bad kaba heh tam ka long 12/- tyngka ha man ka shi kilometer.
Na ka bynta kito ki trok kiba iaid ha ki surok khyndew ka dor ka bai kit ka long 10 tyngka kaba rit tam haduh 14 tyngka kaba heh tam ha man la ka shi kilometer.