Pyrshah ka KSU- NEHU Unit ban pynrung klas, da ka Merit List

Shillong:Ka KSU NEHU-Unit myn hynnin ka sngi ha ryngkat bad ka KSU Educational Cell, ka la pynlong ia ka jing pyrshah ia ki nong pyniaid jong ka skulbah NEHU ban pynrung klas ia ki khynnah pule tang da kaba nujor ia ka Merit List.

U Samla Riches Malngiang uba dei u General Secretary ka KSU-NEHU Unit, u la ong ba ka seng kan pyrshah beit lada ki nongpyniaid jong kane ka skulbah ki shim da kane ka rai ban pynrung klas ia ki khynnah pule da kaba nujor tang da ka merit list, namar kiwei pat ki khynnah pule kiba wan nabar ka jylla ki kham heh ka percentage ban ia nujor bad ki khynnah pule jong kane ka jylla.

“Ka Seng hi tylli lang ngin ia pynbor ia ki nongpyniaid jong kane ka skulbah ba kan pynlong ia ka Entrance Exam khnang ba ka jingpynrung klas ha kane ka skulbah kan long beit ha ka lynti kaba khuid bad kaba shai,” ong u Samla Riches Malngiang.

U la ong ba ka seng hi kam banse ban wan mih da lade shakhmat ban pnsngew ia kane ka jingpyrshah ka jong ki namar ka jingmynthi jong ki nongpyniaid jong ka skulbah NEHU wat hadien ba ka seng ka ladep ban pynsngew ha kine ki sngi ba ladep.

Ha kajuh ka por ka KSU ka la buh ruh ia ka jingdawa na ki nongpyniaid ka skulbah NEHU ban pynkloi noh ia ka jingpynbna ia ki resol jong ki khynnah pule Under-Graduate bad ban pynlong noh ia ka eksamin jong ki khynnah pule kiba hap ban iakhun biang ia ki back paper semester.