U Chairman, ka komishon nongrep, uba haduh 65 snem ka rta, ong ka sorkar

Shillong: Ha ka jingialang Cabinet kaba la long mynta ka sngi, ka sorkar MDA ka lashim ia ka rai ban wanrah ia ka jingkylla ha kaba ia dei bad ka Meghalaya Farmers Commission Amendment Bill 2020. Kane ka jingpynkylla ka long ban buh ia ki kyndon ba u briew u ba bat ia ka ne ka kam kum u Chairman u dei ban long hapoh ka 65 snem ka rta.

Haba ia kren bad ki lad pathai khubor na ka liang jong u bah Prestone Tynsong u la iathuh ba ka ne ka mat ban pynkylla ia ka Meghalaya Farmers Commission Amendment Bill 2020, ka dei ka ba la wan rah da ka tnad ka rep ka riang ha kaba na ka liang jong ka Cabinet ka la mynjur.

U la ong ruh ba jingpynkylla ia kane kan long halor ka rta jong u Chairman jong kane ka Commission bad kat kum ka Act kaba la don ka long ba haba jied ia u Chairman jong ka Commision kan long tang na ka bynta ka 5 snem. Hynrei ka sorkar MDA mynta ka la wanrah ia ka jingpynkylla ha kaba la mynjur ban buh ia ka snem na ka bynta u briew u ban bat ia ka kam kum u Chairman ym dei ban palat ka 65 snem ka rta.

Kawei ka rai ka ba la pdiang da ka Cabinet mynta ka sngi ka long halor ka jing pynjlan ka por trei kam kontrak jong u Secretary jong ka Meghalaya State Consumer Dispute Redressal Forum u HN Areng sa shisnem.