Sa shibnai ka pakhang shnong ha England, pynbna U MRD

U Boris Johnson, myntri rangbah duh ka England, u pynbna hynnin ka miet, ba katei ka Ri, kan khang shnong, haduh shi bnai kynthih, kaba sdang naduh ka Sngi Palei, ka ban wan.

Katei ka pakhang shnong kaba ar, ka dei hadien saw bnai jong ka pakhang shnong ba shibnai, kaba la pynlong ha katei ka Ri, na ka daw jong ka jingpang corona virus.

U Johnson, u pynbna, ba u paidlang ka England, un hap ban shong khop ha iing, na ka bynta saw taiew kynthih, naduh ka Sngi Palei bad katei ka long lada ka iing dorbar jong katei ka Ri, ka pdiang ia ka jingtyrwa jong u myntri rangbahduh.

Kito kiba lah ban mih, ki long kiba leit skul, kiba leit trei, kiba leit shim dawai, kiba ialeh kilan met, kiba leit thied jingthied. Ki liengsuin kiba iaid sha kiwei pat ki ri, yn khang shwa.

U Johnson, u pynpaw ia ka jing sngewkhia, da kaba ong ba kane ka jingpang ka la nang saphred jur ha ka Ri Europe baroh kawei, kaba long palat ban ia kaba la jia haduh mynta. “Lada ngim leh eiei noh, ka jingiap kan bun bad ka ban palat, na kaba long ha U Iaiong ba ladep” bad ula ong shuh shuh ba ki hospital, ha ka bynta ba shathie jong ka England, kin sa dap smam, da ki nongthiah pang, lada ngim leh eiei noh bad kan don ka jingeh kaba khraw ha ka koit ka khiah bad ka jinglong jingman ki paidbah. Katei ka pakhang shnong, kan kut haduh ka 2tarik Nohprah 2020.