“Nga thiah mar syndah bad ki masi bad nga thiah aram, khlem bam khlem dih”

Shillong:Ha ka bynta kaba ar jong ka jingiakren shaphang ka jingim jong u samla Shlurbha Khaii, utei u samla, u iathuh ba ula sdang leit skul ha u snem 2012 bad u ong “Ha u snem 2012, nga shong Class I” bad u ong biang “Ha ka skul jongngi ha Good Shepherd, ha ka shisnem, ngi don saw tylli ki eksam bad kumta ha man ka unit test, ki pynkiew class ianga bad khamtam, namar ba nga lah heh”.

“Te ha u snem 2012, nga shong class I, ha u snem 2013, nga shong Class IV, 2014 pat nga shong Class VI bad 2015, nga shong Class VII bad naduh nangto nga iaid beit Class VIII, Class IX, Class X” u iathuh shuh shuh.
Ha ka jingleit bylla sngi, ha shwa ba un leit skul, U Bah Shlurbha, u iathuh ba ka dei ha u snem 2009, ba u leit trei bylla ha Byndihati, ba u ioh kamai T.3,000 shisnem lane kaba long T.240 shi bnai.

Halor ka jingbang pat ka kam sharai masi, U bah Shlur u ong “Ka kam sharai masi, ka dei kaba ngam juh klet ha ka jingim jongnga. Ngim juh tieng, namar ki don ki masi”.

Nangta, ula iathuh ruh halor ka jingim kaba ngiew, kaba u mad ha ka por ba u ap masi bad kata ka long ha u snem 2006 bad ula ong “Namar nga la slem ban khang ia ki masi sha sem bad ba la dum nga miet, nga la tieng ban leit phai sha iing. U khaw ym don, ka bam ym don, kumta thiah lang bad ki masi baroh shi miet, nga thiah mar syndah bad ki masi bad nga thiah aram, khlem bam khlem dih. Kane ka dei kaba ngam lah ban klet ha ka jingim jongnga”.

“Ynda khie mynstep, nga sngew kumba don ba leh ieid, hynrei ngan da khie, ki masi, ki jliah ia u shniuh jongnga, ki jliah ia ka met jongnga” ong shuh U Bah Shlurbha. [sa peit ruh ia ka youtube jong u rupang.com]