Don mano sha, ban kyntait ia ka phew klur?

Ka mei ieid Spility Lyngdoh Langrin, ka bym lalot pisa bad kaba im duk ialade, haduh ka sngi jingiap, ka la khlad noh na ka sla pyrthei bad khlem pep, ka long ka jing iam briew, hapdeng ka hok ka sot pyrshah ka tuh ka bamsap, kaba la jyllei tasam ha kine ki sngi.

Ha kaba kum kane ka khep, ka wan ka mat “Don mano re u bym kwah tuh, u bam kwah bamsap?”.

Kane ka jingkylli, kam don satia ia ka jubab, ha ka jylli jong ka imlang sahlang, ha kine ki sngi, lada ka dei ha kiba trei kam lajong, kiba trei kam sorkar bad khamtam ha kiba trei kam sain pyrthei bad katei kam donkam ban dang iakren, hynrei ki jingshisha ki kren briew, ba u briew, uba shong iing wai, ha ka por ba um pat donkam, hynrei, un da la ioh kam business, lane un da ioh kam sorkar bad khamtam lei lei, un da la jop elekshon, utei u juh u briew, un thied jaka da ki phew tylli bad un tei iing ruh da ki phew tylli bad ia katei ngi iohi, ba kiba bun ki MLA/MP kiba thied lut ia ki jaka ki puta, u duk u rangli bad mynta, ki niew pisa man la ka minit bad katba nang iaid ka tih surok, ka tih uranium bad kumta ter ter; kitei pat ki nang khan nusip ialade bad katei ka dei ka jingbam u thlen ia u para Khasi.

Lait na ka mei ieid Spility, ngi lah ban ong, ba u dei tang U bah Hopingstone Lyngdoh, u bym thied kali, u bym thied jaka, u bym thied iing thied sem, wat la u long nong mihkhmat haduh 50 snem antad bad haduh ba un da iap.

Ka jingkylli, kaba mih, ka long la ki dang don ne em, kum kitei ki arngut, ha ka imlang sahlang jongngi ha kine ki sngi?

Ngi la lilam ia la ki jaka ki puta, ngi la ailad ha ka khaii pateng, ngi la ai jingbit ha ka ia trei kam trei jam bad ngi la ai laisen ia ki briew kiba nabar, dei beit tang kawei ka phang bad kata ka long ka jing lalot pisa bad kane ka jingeh, kaba ngi ia kynduh ha Majai, Ichamati, ha Jaintia Hills bad ter ter, kam dei satia, kaba ki wan thombor ki briew kiba nabar, hynrei mangi ki trai shnong, lem bad ki ophisar, ki nongmihkhmat kiba mih na ka long rynieng khasi ba nylla, ki la die duh ia ka hok nongkynti jong u khasi, tang na kawei ka daw, kata ka long ba ki kwah ban klun lut ia ka tyngka pliah shalade.

Ka mei ieid Spility, ka la leit noh, hynrei ka jing kylli, ka long la ngi don katno ngut na ki khun ka jaidbynriew, ki ban bret ia ka tyngka pliah, na ka bynta ban ieid ia la ka shnong, ka iing bad ka jaitbynriew?