KHASI STUDENTS’ UNION

Carmel Fedrick Malngiang

1) Ko seng Khasi Students’ Union,
Waitlam bakhlaiñ ka Ri pha long;
Nongwei ki tieng, ki kyiuh, ki ma,
Tang sngew kyrteng shynrang jong pha.

2) Snem khat-khyndaispah hynñiewphewphra,
La seng, la suit la shor ïa pha;
Nongrim jong pha la Ri ban da,
Ban bud dienjat ki longshuwa.

3) Pha long ka shlem bad nongsaiñdur,
Ban lam lynti ïa ki ‘riewshlur;
Pha long kumjuh ka nonghikai,
Ï’u khun ka Ri pha ai jingshai.

4) Shibun ki nongïalam pha sei,
Ki khun ba dap-shynrang i Mei;
Kiba kitkhlieh ïa la ka Ri,
Jingsniew, thala kim ju aili.

5) Hapdeng jingïaid lynti jong pha,
Pha shem shibun ki jingtyrha;
Pha ïaid lyngba ki at ki them,
Hynrei nongrim ka ïaineh skhem.

6) Pha long shisha ka stieh ïada,
Ïala ka Ri ban pahara!
Pha tur pha thom sha madan thma,
La jaw ka snam ruh pham salia.

7) Ka Ri ka shngaiñ ba don mapha,
Namar pha long ka nongïada;
Pham hun ban peit ï’u khun ka Ri,
B’un shah kjiap ha ki mynder ri.

8) Ki mynder ri, ki khyllah jait,
Ïa pha ki thrang ban pynduhjait;
Ki beiñ ki khoh laiphew-rukom,
Hynrei ïa pha kim nud ban thom.

9) Ki ingkhongshyllangmat kumjuh,
Na dpei kum u sing ki kyrhuh;
Ki beiñ ki kynthoh bun rukom,
Ïa pha tang ban pynjah burom.

10) Hooid ïa pha ki lah ban beiñ,
Hynrei kim lah pat ban pynkheiñ!
Watla ki thmu ban kjiap ïa pha,
Pha ïeng skhem triang pham ju kylla.

11) Katba dang im ka K.S.U,
Kat dang kaweh ka lama blu!
Ko Ri Khasi phan ym long mraw,
Nongwei um shlan ban leh bakhraw.

12) Ban im ka Ri pham ju shongthait,
Ban shngaiñ ka Ri pha sei ki khlawait!
Nang maitshaphrang ko Khlur ka Ri!
Nang ïai im slem ko Ri Khasi!

Kyrteng:- Carmel Fedrick MalngiangMalngiang
Jaka sah: Wahkaliar, Sohra, East Khasi Hills district, Meghalaya 793108
Ph. no.:- 6009594917
Email: [email protected]