Thwet ka Bangladesh, ba mih kyrkieh u heh duh ka ULFA na Mendipathar sha Sylhet

Ki bor shipai jong ka Bangladesh, ki dang thwet tyngeh, ia u satar jong ka ULFA (I), U Drishti Rajkhowa, ha ki bynta jong ka Sylhet, ong ka khubor.

Katei ka jingtip, ka leit poi sha ki shkor jong ka sorkar Bangladesh, haba la don ba iohi, ba u don ha Jaflong ha ka taiew ba ladep bad kaba dei ruh ka por, ha kaba U Imran Ahmed Siddique, u High Commissioner jong ka Pakistan, u don ha katei ka jaka ban shongkai pyngngad.

U Imran, ula leit sha Sylhet ban ia kynduh ia U Mayor jong katei ka jaka, uba dei na ka seng BNP, U Ariful Haque Chowdhury bad katei ka la pyn artatien jur ia ki heh jong ka sorkar Bangladesh. La iathuh ruh ba U Choudhury, ula kyntait ban iakynduh bad U Imran ha ka minit kaba khadduh bad katei ka la nang pyn suba shuh shuh ia ki bor sorkar jong ka Bangladesh.

Ki pulit syntiat ka sorkar India, ki iathuh ba U Rajkhowa, uba dei uba wan ba ar ha ka jingtrei kam jong ka ULFA, hadien jong U Paresh, ula don ha u bnai ba ladep ha Mendipathar, ha Garo Hills, jong ka Meghalaya bad la shim namarkata, ba u leit hiar khnang sha Sylhet, ba ka don ka daw kaba kongsan bha ia u.