Ka ain CAA, kan sa trei kam noh shen, ong u heh duh ka BJP

U JP Nadda, President ka seng BJP, u kren shai mynta ka sngi, ba ka ain Citizenship (Amendment) Act, ka shu sahteng mynta shi por bad ula ong ba katei ka ain kan sa trei kam noh shen ha ka Ri.

U Nadda, haba kren ha ka jingialang bad ki kynhun bapher ha north Bengal, u kynnoh ba ka sorkar jong ka Mamata Banerjee ha West Bengal, ka iaid da ka buit pynpait pynpra bad ka trei kam, tang ban myntoi kito kiba don ha ka seng jongka bad kam dei kum ka seng BJP, kaba trei, na bynta ka bha ka miat jong u paidlang ha ka ri baroh kawei.

Baroh phin sa ia myntoi lut na ka jing pyntrei kam ia ka ain Citizenship (Amendment) Act. Ka dei ka ain kaba la mynjur da ka Parliament bad ngi la kut jingmut ban pyniaid beit shakhmat, ong U Nadda ha ka jingialang. “Mynta na ka daw jong ka U Covid 19, ka jing pyntrei kam ia ka CAA, ka la sahteng, hynrei ka kam, ka la nang iaid shakhmat bad ki ain kin sa mih kiba iadei bad katei ka kam bad kan trei kam noh shen shen” ong U Nadda.

Haba kren pyrshah ia ka sorkar Trinamool Congress, U Nadda, u ong ba ka sorkar jong ka Banerjee, ka la pyndiaw mynsiem shi katdei ia ki jaitbynriew Hindu ha Bengal bad mynta ka sdang ban lum ban lang biang ia ki Hindu, namar ba ka tieng, ioh ka duh, ia ka shuki myntri rangbah bad kane ka dei ka politics thap vote suda, ula ong shuh shuh.