BJP Vrs NPP

Babu Kular Khongjirem

Ha kine ki khyndiat sngi ba la dep pat,ka thma ktien(war of words) bad ka jingiakawang ktien hapdeng ki nongialam ka NPP bad ki nongialam ka BJP ka nang lynguh hi pum katba nangmih ki sngi ki taiew.

Ka daw ba kongsan kalong halor ka jingkwah ka BJP ban shai halor ka bamsap ha GHADC bad JHADC bad ban ai ka jingtokit(enquiry) ba laitluid ha ka CBI.Ka jingrai ka sorkar MDA ban pyntreikam ia ka Central Bonded Ware House ka la pyning khong shuh shuh ia ka BJP namar kane ka rukom kan ialam pynban ia ka Meghalaya sha ka Mafia state bad ka jingbam sap ba shyrkhei ia ki political leader kiba pyniaid ia kane ka sorkar MDA namar ha Rajasthan bad Uttar Pradesh kin hap pynduh noh ba ka ialam pynban sha ka mafia state katba hangne ha Meghalaya pat, ka state kaba la niew bad tip ia ka kum ka Ri tip briew tip Blei ka sorkar ka kwah pynban ia kum kine ki jaitkam shyrkhei.

Ka jingai ding shuh shuh u Deputy Chief Minister ban ai Yellow Card ia ka BJP na ka sorkar MDA ka la nang meh ding shuh shuh ia ka thma ktien hapdeng kine ki ar tylli ki party.Hynrei,lada shah weng noh ka BJP na kane ka sorkar MDA,kan wan rah ka jingeh, kynrum kynram bad ka jingktah(impact) kaba shyrkhei bha ha Meghalaya jongngi.

U Chief Minister bad u Deputy Chief Minister kin kham lehrain lehsuin bha ban leit rah bolw man ka por na Meghalaya sha Delhi na ki Minister bapher bapher jong ka Delhi.Wat lada ki leit khrong ruh,ka Delhi kan nym satia ne patiaw eh shuh ia ki.Ym tang katta,u Governor udei u jong ka Sorkar BJP na Delhi.Ka lah ban mih ka jingia pyni bor hapdeng u Chief Minister kane ka sorkar MDA bad u Governor kumba ka la jia ha ka sorkar AAP ha Delhi,ka party TMC ha Kolkatta bad ha Rajasthan ruh.

Ka President’s Rule ruh ka kloi bha lada don tang i jingjia ba malu mala hangne ha Meghalaya.Tang shu don ka BJP sharud ka sorkar MDA,ka jingiadei ka NPP bad ka sorkar NDA ha Delhi ruh kan ktah lang.Bad tang shu bakla tiak,kane ka sorkar MDA ka lah ban kyllem noh pynban namar ka Delhi kan sa thaw lad hi sia ban pynkhyllem noh kumba long ha kiwei kiwei ki state ki bym synshar ka BJP.Ka bor u Chief Minister bad ka jingkop u Deputy Chief Minister ka Meghalaya kin nym lah satia ban shan ha ki bor u Modi,u Rajnath Sing bad u Amit Shah na Delhi.