Sha U Modi phah dorkhas ka President jong ka AIMC, ba shah niew bein ki Bengali ha Meghalaya

Shillong:Ka President jong ka All India Mahila Congress (AIMC) ka Sushmita Dey mynta ka sngi ka la thoh daka dorkhas sha u myntri rangbah duh ka Ri u Narendra Modi halor ka jing shah niew bein jong ki jaitbynriew Bengali kiba sah ha Ichamati bad ha Bholaganj jong ka jylla.

Ha kane ka shithi ka Sushmita Dey ka la thoh ha ka shithi ba “Nga lah phah bunsien ka dorkhas sha u myntri rangbah ka jylla u Conrad K Sangma hynrei haduh mynta u khlem leh ei ei, namar kane nga thoh sha phi namar baka NPP kadei ruh ka sorkar synroplang ka NDA ban ai jing iarap iaki jaitbynriew Bengali kiba sah ha Ichamati bad ha Bholaganj jong ka jylla Meghalaya”.

Ka Sushmita Dey kala pynpaw sha u myntri rangbah duh ka ri ba ki jaitbynriew Bengali kiba sah ha Ichamati bad ha Bholaganj jong ka jylla Meghalaya ki im hapdeng ka jing shah niew bein bad ki donkam ka jing iada kyrkieh mynta ka kynti.

ha ka ne ka dorkhas ka la pynpaw ruh ba naduh ba mih ka jing iakhih hapdeng ki samla Khasi ha u bnai Jymmang 2019 ki jaitbynriew Bengali kiba sah ha Ichamati bad ha Bholaganj jong ka jylla ki don hapdeng ka jing ma naka jing shah leh bein bad ki shah kyntiat ruh bun ki lad iarap na ki bor peit bad nong pyniaid shnong.