KA JINGIAID KJAT: KI JINGMYNTOI BAD KA JINGKOIT JINGKHIAH PHI IOH NAKABA IAID KJAT

Kong Linda Kongwang

Lait na ka jingleit iakynduh iaki doktor ne ka jingpyndonkam ne dih dawai khah khah manla kapor naka bynta ki jingshitom kiba phi iakynduh, ki dang don shibun ki lynti kiba philah ban leh hi naka bynta ka jingkoit jingkhiah jongka met. Ki don shibun ki jingmyntoi phi ioh da kaba kilan met, bam ki jingbam ba tei iaka met, ialehkai, iohthiah bha bad ka jingiaid kjat kadei kawei naki jingmyntoi bad kaba kongsan napdeng kine. Ka jinglah ban iaid 50-60 minit haka shisngikadei kaba bha tam naka bynta ka jingkoit jingkhiah jongka met.
Hangne ka jingthoh ka kdew shai iaki jingmyntoi nakaba iaid kjat bad kaei ka daw kaba lah ban ai mynsiem ban iaid.

KIEI KI JINGMYNTOI PHI IOH HABA IAID KJAT?

1. KA JINGIAID KJAT KA PYNSMAT PYNSTING BAD AIBOR IAKA MET:— Ka jinglong smat long sting jongka met ka wan ymtang naka jingkilan met hynrei naka jinglah ban iaid kjat ruh. Bunsien haba treikam da kaba shu shong sah shijaka, ka pyntlot iaka met bad kane ka ialam shaka jinglong thait kloi haka met. Hynrei ban pynmlien iaid man ka por ka iarap ban pynduh ia kine ki jingeh bad phi nangiohbor ban treikam. Katto katne ki nongwadbniah ki pyni ba ka jingiaid kjat ka dei ka lynti kaba biangtam ban lait naka jinglong thait kloi ka met kaba kyntiew iaka jinglong smat long sting bad ka jingkoit jingkhiah jongka met.

2.KA JINGIAID KA IARAP HALOR KA JINGHIAR KA JINGKHIA:— Ka jingkhia ka met kadei kawei kaba lah ban pynduh mynsiem ha manla ki kam kiba phi kwah ban leh. Bunsien phi thrang ban leh bunjait ki kam haka jingim, hynrei ka jingkhia ka met kam ailad iaphi ban leh. Phim dei ban khuslai, pynmlien ban iaid kjat la kumno kumno 30 haduh 60 minit haka shisngi, kane ka jingmlien ka lah ban thang daki spah calories bad iarap kyntiew halor ka jinghiar ka jingkhia jongka met bad ka kyntiew halor ka jinglah ban pynurlong iaki kam kiba phi angnud ban leh.

3. KA JINGIAID KJAT KA IARAP NAKA BYNTA KA JINGIOHTHIAH BHA:— Ka jinglah ban iohthiah bha mynmiet ka dei ka lynti kaba biangtam ban tehlakam ia baroh ki jingeh kiba phi iakynduh. Hynrei ban iohthiah bha phi donkam kilan met, trei iaki kam kiba lah ban pynmih syep bad pynthait iaka met bad pynmlien ban iaid kjat manla ka por. Ka jingmlien ban iaid kjat la pynduna iaka jingbankhia bad iarap kyntiew halor ka jingtuid bha ka snam sha baroh ki bynta jongka met kaba ialam shaka jingpalei jongka jingmut jingpyrkhat bad ka jingkhamlong aram iaka met ka phad ha kaba kut jongka sngi. Namarkata pyrshang ban iaid khnang ba phin iohthiah bha hakapor miet kiba donkam naka bynta ka jingkoit jingkhiah jongka met bad naka bynta ka jingbha ha baroh ki liang.
4. KA JINGIAID KJAT KA IARAP HALOR KA JINGTREIKAM BHA KA JABIENG:— Ka jingtreikam palat bad ka jingban khoa la jingmut jingpyrkhat kalah ban ktah shikatdei eh iaka jabieng kaba ialam sha ka jingtlot noh ka bor pyrkhat. Ki nongwadbniah ki pyni ba ka jingmlien ban iaid katto katne kynta man ka sngi ka iarap halor ka jingtuid bha ka snam sha ka jabieng bad sha baroh ki bynta jongka met bad kane ka iarap ban pyllait na shibun ki jingshitom haka khlieh. Ka jingiaid kalah ruh ban iarap halor ka jingshah banbor la jingmut jingpyrkhat bad kyntiew ruh iaka bor pyrkhat khamtam ia kito kiba la heh ka rta.
5. KA JINGIAID KA PYNKHLAIN IAKI DOHKSAH:— Ka jingleh jngai naka jingkilan met ka buh jingma naka bynta ka jingkoit jingkhiah jongka met bad kine ki pyntlot iaka met bad ka jingtlot ka met ka nang pyntlot iaki dohksah. Ka jinglah ban kilan met bad iaid kjat ka kyntiew iaka jingkhlain ki dohksah, ka iarap halor ka jingsngew smat sting ka met ka phad bad kane ka pynsuk iaphi haba treikam bad lait naka jingthait kloi.
6. KA JINGIAID KA IARAP HALOR KA JINGSNGEWBHA KA MYNSIEM:— Ngi sngewthuh bha ba haba ngi iaid katto katne kynta manla kasngi, ka ai jingmyntoi shibun iangi bad kine ki jingmyntoi ki wanrah jingkmen haka mynsiem. Ka daw ba shadien jong kane ka long baka jingiaid bad kiwei ki exercise ki iaiam shaka jingpynmih iaki kynja dawai pynkmen haki endorphins baroh ka met bad ki ieh hangi iaka jingsngew hun bad kmen.
7. KA JINGIAID KA IARAP PYNDUNA IAKA BLOOD PRESSURE:— Ka jingkiew ka blood pressure ka ktah shibun iaka jingkoit jingkhiah jongka met khamtam iakito kiba la kham heh ka rta bad kane ka buh jingma iaka jingim kaba phi donkam ban phikir. Ka jingwadbniah naki jingpule bapher bapher ka pyni ba ka jingkilan met bad ka jingiaid ne mareh kilah ban pynduna halor ka jingkiew ka blood pressure, ka cholesterol bad ka diabetes. Ka jingiaid ne mareh kumba 30 haduh 60 minit haka shisngi ka iarap halor ka jinghiar ka jingkhia bad kane kadon jingiadei halor ka jingbiang ka blood pressure bad ka jingbiang ka blood pressure kan iarap pyllait ruh na kaba pyndonkam palat iaki dawai BP, kumta pyrshang ban iaid, mareh ne ban kilan met ban ioh ka met ka koit ba khiah.
8. KA JINGKHLAIN KI SHYIENG:— Ka jingiaid ka shim iaka bynta ba kongsan kum ka jingkilan met kaba biangtam naka bynta la jingkoit jingkhiah jongki shyieng. Ka lah ruh ban iada naka jingpang kaba iadei bad ka jingtlot bad stang jongki shyieng ia kiba latip kum ka osteoporosis kaba dei ka jingpang kaba ktah iaki mat bad baroh ka met. Namarkata pynmlien ban iaid khnang ba phin lait na kine ki jingeh bad ban ioh iaka met ka ba koit ba khiah.
9. KA JINGIAID KA KYNTIEW IAKA KOIT KA KHIAH JONG U KLONGSNAM;—- Kumba ngi tip baka jingiaid katto katne kynta bad kiwei de ki jingkilan met ki ai jingmyntoi iangi, kumjuh ngi tip ba kadei ruh ka lynti kaba biangtam ban pynduna na ka jingma jongka jingpang klongsnam. Ka jingduna ka jingkhia ka met, ka cholesterol bad ka jinghiar ka blood pressure ki iarap ban pynlait naka jingshahktah jong u klongsnam. Kumba ka jingkilan met me ka jingiaid kilah ban pynkhlain ia ka met kumta hi ki lah ban pynkhlain ia u klongsnam lyngba ka jingtreikam bad ka jingtuid bha ka snam sha baroh ki bynta jong ka met. Khublei.