Rai ka cabinet ban pynsangeh election bad pynjari da ka AR ha GHADC

Shillong: U Myntri Rangbah ka jylla U Conrad K Sangma, u iathuh ba ha ka jingialang Cabinet ka ba la long mynta ka sngi la shim ia ka rai ban pynjari da ka Administrator Rule ha Garo Hills Autonomous District Council.

Haba ia kren bad ki lad pathai khubor u la ong ba ka Cabinet ka la rai ka pynsangeh ia ka general election na ka bynta ka GHADC bad ia ka tarik ban pynlong ia kane ka election yn sa rai hadien kat kum ka jinglong jingman jong ka khlam Covid-19 ha ka jylla.

U la iathuh ruh ba ka cabinet ka la rai ban aiti ia u lat ka jylla ban pynjari da ka Administrator Rule ha GHADC. U myntri rangbah, u la ong ruh ba kat kum ka Sixth Schedule, kane ka jingpynjari Administrator Rule kan long kum ba 6 bnai. U Myntri rang bah u la ong ba kane ka jingpynsangeh ia ka election ka long hadien ba la shim ia ka rai na ka tnad ka koit ka khiah, namar ka jingbun ka jingkiew jong ki briew kiba ioh ia ka jingpang Covid-19 ha ka jylla.