KA KAM KHWAI DOHKHA: HATO PHI SNGEW TYNNAD BAN LEIT KHWAI? KHMIH KIEI KI JINGMYNTOI PHI IOH HABA LEIT KHWAI

Kong Linda Kongwang

Hato phi tip, ka kam khwai dohkha kadei ka kam kaba eh tam ha pyrthei bad ka dei ruh ka kam kaba sngew tynnad tam ban leh khamtam lada nang ban khwai. Ia kane ka kam philah ban ong ka long kum ka jingkilan met, ka jingialehkai sports, ka jingsngew tynnad, ka kam kaba ai jingmyntoi bad ka jingtbit. Kadei ka kam kaba lah ban shim bynta da baroh naduh ki kynthei haduh ki shynrang, ki khynnah ne ki tymmen ne kino kino ki kyrdan treikam. Kane ka kam kadei kaba phylla tam namar shisien phi lah sdang ban khwai phin klet ialade phi dei u ei ne phi wan na ei, baroh ka donkam tang ban ioh khwai noh. Kum ki nongkhwai phi sngewthuh haduh katno ka ai jingkmen khamtam haba ioh ban khwai shibun ki dohkha.

Katkum ka jingwadbniah iakane ka kam lasdang naduh ki phew hajar snem mynshuwa. Kadei ka kam kaba ju leh da baroh ki ri ka pyrthei khamtam ban ioh bam, ban thad, ban die bad kane ka kam kan iaid beit pateng la pateng. Ka jingnang bad tbit ban khwai dohkha ym tang ba ki ai jingkmen iaphi hynrei phi ioh ruh shibun ki jingmyntoi na kane ka kam.
HANGNE KI DON KATTO KATNE KI JINGMYNTOI KIBA KI NONGKHWAI KI IOH NA KABA LEIT KHWAI.

1. KA JINGKOIT JINGKHIAH JONGKA MET:— Bunsien haba shong bad trei sah shi jaka ka ialam sha ka jinglong khia ka met ka phad bad kine ki wanrah shibun ki jingpang jingshitom haka met, hynrei iakine phin ym lap ha ki nongkhwai. Ka jinglah jongki ban leit khwai man laka por ka ai jingmyntoi shibun iaka met kynthup iaka jinglong smat bad sting ka met, ka pynkhlain iaki dohksah, kyntiew iaka jingtreikam bha jongu klongsnam bad kine baroh ki wanrah jingkoit jingkhiah ha ka met bad ki ai jinghun iaka mynsiem.
2. KYNTIEW IAKA JINGPYNLEIT JINGMUT:— Kiei kiei ki kam phi leh khlem da pynleit jingmut, ha kaba khatduh phin shem ba kim long kiba biang bad kim ai jinghun iaphi bad kine kin kyntiew iaka jingsngewduh mynsiem ha man la ki kam phi leh. Naka kam khwai dohkha phin ioh shibun ki jinghikai halor kumno ban pynleit jingmut namar kane ka kam ka donkam shisha iaka jingpynleit jingmut kaba thikna khnang ban ioh bun ki dohkha bad kane kan iarap halor ka jinglah ban pynleit jingmut ha kiwei ruh ki kam kiba phi leh. Ban ioh kem iaki dohkha kam dei kaba suk, phi donkam ban pynleit jingmut bha bad sngewthuh kumno ban thawlad ban iohkem iaki dohkha hapoh um bad kine suki suki kin iarap halor ka jingpynleit jingmut ha baroh ki kam kiba phi leh.
3. PYNDUNA KA JINGBANBOR JONGKA JINGMUT JINGPYRKHAT:— Kat kum ki jingwadbniah, lashem ba 86% ki briew ki don iakane ka jingshitom. Ka jingbanbor jongka jingmut jingpyrkhat kadei ka jait jingshitom kaba ymdon dawai ban sumar iaka bad kane ka ktah shibun iaka jingkoit jingkhiah jongka met, kaka jingmut jingpyrkhat bad ha shilynter jingim. Ka jinglah ban leit khwai man laka por ka khate noh iakine ki jingeh bad iarap pynduna halor ka jingkhuslai jingmut. Kane kadei namar ka jingdonkam ban pynleit jingmut haka por khwai kan pynklet iaki jingeh kiba phi ju pyrkhat borabor bad ngam beit tang ban ioh khwai. Kane ka iarap aipor ruh iaphi ban pyrkhat halor ki jingeh kiba phi iakynduh bad kumno ban tehlakam iakine ki jingeh khnang ban lait naka jingbanbor jongka jingmut jingpyrkhat.
4. KA KAM KHWAI DOHKHA,KA JINGKILAN MET KABA BIANGTAM:— Ka jingbymiohpor ban kilan met na kiba bun ki daw, ka pyntlot noh suki suki iaka bor met bad kane ka ktah shibun iaka jingkoit jingkhiah jongka met hadien. Hangne ruh ki nongkhwai ki ioh shibun ki jingmyntoi namar ka kam khwai latip ba kadei ka jingkilan met kaba biang tam namar kam dei ka kam kaba suk, donkam ka jingtrei shitom kum ka jingpyntreikam iaka jabieng, ki kti ki kjat bad ka met hih baroh kawei bad kane ka kyntiew halor ka jingtreikam bha jongu klongsnam bad pynkhlain iaki dohksah kiba iahap bha bad ka rukom kilan met kiba ju leh ha la iing.
5. KA JINGIADEI BAD KIWEI: Ka jingbymdon paralok ha ka jingim bad ka jingsngew long marwei ka buh jingma iaka jingim bad iaka jingkoit jingkhiah ruh. Ka jingbymdon bynta haka imlang sahlang kan nang pynkhuslai iaka jingmut jingpyrkhat kaba ialam sha ka jingduh jingkyrmen haka jingim. Haba iadei bad ka kam khwai, kine baroh kin ym iohlad ban treikam namar ha ki jaka khwai, ym don kynthei ne shynrang baroh phin iohi ba kilong kumjuh. Ka jingsngew muja ban ioh khwai kan pynkmen iaphi bad iakiwei kiba don hajan khamtam haba iohkem dohkha bad kine ki iarap ban pynsngewtynnad bad iajan bad kiwei kaba ialam sha ka jingiadei kaba bha bad kiwei. Ka jingdon bun ki paralok khamtam haki rud um rud wah kan iarap shuh shuh iaphi ban nang shemphang bad pyllait iaphi na shibun ki jingeh.
6. KYNTIEW IAKA JINGBUROM IALADE:— Ka don ka jingong, lada philah ban burom ialade phi lah ban burom iakiwei bad lada phim burom ialade da lei lei phin ym lah ban burom iakiwei ruh. Ka jingleit khwai dohkha ka dei baroh shaphang ka thong jongka jingjop kumno ban iohkem iaki dohkha. Ka dei ka jingstad kaba philah ban pyni baroh shirta bad ka jingiohkem dohkha haka sien kaba nyngkong ka ai jingkmen bad wanrah burom ialade. Bunsien phin shem kito kiba ju kem bun ki dohkha man la kapor ki ju ai mynsiem ia kito ki bymdanang bha ban khwai ban nang iai pyrshang bad kane kan nang kyntiew iaka jingburom ialade bad kiwei ruh kin burom kylliang iaphi.
7. KA JINGLONG IAISHAH BAD JAI JAI:–Ha ka jingshisha, ka kam khwai dohkha kalah ban pynsngewsih ne sngewngiah na ka bynta kito ki bymdon ka jingiaishah bad ka jinglong jai jai haki. Kumba la kdew kam dei ka kam kaba suk, kalah ban shimpor da ki minit ban iohkem iaki dohkha bad kalah ban shimpor da ki kynta ruh ne baroh shisngi ban iohkem. Kane ka kam kan iarap ia phi ban sngewthuh shai ba phi donkam ka jingiaishah bad long kiba jai jai bad pynleit jingmut kumno ban ioh khwai. Kane ka jingmlien suki suki kan iarap kyntiew iaka jingiaishah bad ka jinglong jai jai ha manla ki kam phi trei bad kine ki wanrah jingmyntoi shibun haka jingim.
8. KA JINGDON KYRHAI KA VITAMIN D:— Kane ka Vitamin kaba lah ban ioh lyngba ka jingpynshah sngi iaka met, kadei kaba iarap halor ka jingtreikam ka calcium bad ka phosphate kaba don haka met jongphi. Lyngba ka jingdon kyrhai ka Vitamin D haka met kan pynioh iaka jingkoit jingkhiah jongki shyieng bad ki bniat bad kane ka iarap shibun khamtam ia kito kiba lah heh rta. Kane ka jait Vitamin ka pynkhlain iaki immune system kaba don jingiadei halor ka jingialeh pyrshah ban pynduna iaka depression.
9. KI LAD KAMAI:— Ka jinghiran kam naduh ki por mynshuwa haduh mynta ka buh jingeh shibun haka jingim jong kiba bun. Hynrei ngim dei ban khuslai, haba don ka mon hangta don ka lad. Lait naki kam ophis ki dang don shibun kiwei pat ki lad kamai kiba lah ban pynioh nong iaphi bad ka kam khwai ka dei kawei naki lad kamai kaba biang tam kaba lah ban pynioh nong khlem da donkam ban pyllut than. Kadei ka kam ha kaba bun ki briew ki im bylla sngi bad ioh kamai da kaba die hadien ba la iohkhwai ia ki bad lada phi dei kiba nangbha ban khwai kan iarap pyniohnong kham bun ban ia kiwei pat ki jait kam. Lyngba ka jingioh khwai phi lah ban bam, ban die, bad phi lah ban thad tyrkhong bad sa die pat ia ki…….Khublei