Kulmar kiba haiing bad ka shnong mar ia ioh jingtip ba uba ki la tep dei uba khlad na ka khlam CIVID-19

Nongpoh: Kawei ka longiing lem bad ki briew ha shnong Umwiehsnieh ha Ri Bhoi District, ki la kulmar hi thlim, namar uwei u rangbah uba la khlad ha ka 02 tarik mynta u bnai ha Civil Hospital Shillong bad uba ki la dep ban tep don burom, hynrei haba ki la dep tep ia utei u rangbah, la ioh ia ka khubor pyntip na Civil Hospital, kiba la ong ba utei u Rangbah u la khlad na ka jingpang COVID-19.

La ioh jingtip ba utei u la leit shah sumar ha sha Civil Hospital, ka dei hadien ba u shitom prie bad suh ka kpoh, pynban ba la jur palat ka jingshitom utei u rangbah u la khlad noh na kane ka pyrthei bad kaba la pynlyngngoh eh ia kiba haiing bad nongialam shnong, ka dei hadien ba la pynbna ia u ba u dei u ba ioh pang COVID-19, hynrei ia ka met jong utei u rangbah la dep ban tep don burom ia ka met jong u da kiba haiing hasem bad ka bor Shnong.

Katei ka jingpynbna ka Civil Hospital Shillong ba udei uba ioh pang COVID-19 hadien ba la dep tep ia ka met ka la pynlyngngoh bad ktah lut ia kiba haiing hasem, ki lok ki jor bad ka shnong ka thaw. Ki la don kiba ha iing kiba la ong ba kan myntoi aiu ban pynbna ba u ioh pang COVID-19 namar ha ka por ba la tep ïa ka met kam shym la don ka jingbud ryntih ba hap ban phikir kumba la leh ïa kito kiba khlad na ka khlam COVID-19.

Uwei na kiba haiing, ula ong ba ki bor pyniaid ka Civil Hospital Shillong, ki la ailad ban rah ia ka met na ka bynta ban leh burom khatduh ia utei u rangbah bad khlem da ong eiei ba u pang COVID-19, namar lada la pynbna ba u pan COVID 19, kiba haiing lem bad ka shnong ka la nang ban leh ia kaba donkam, hynrei mynta haba la dep tep, kan myntoi aiu shuh haba bun ki ba haiing hasem bad ki lok ki jor ki la shim bynta ha ka jingtep burom ia ka met utei u rangbah.

U la pynpaw ruh da kaba ong ba kaba sngewlyngngoh ruh ka long hadien ba la dep ban tep ia ka met, la wan kata ka jingbthah na ka tnad ka koit ka khiah, ba kito kiba shim bynta ha ka jingleit ontep ia ka met ki hap ban shong khop ha iing Home Quarantine.

Namarkata, u la ong ba na ka liang kiba haing hasem ki kyntait ia ka jingkam ka Civil Hospital Shillng ba utei u rangbah u iap na ka khlam COVID-19 bad ki dawa ruh ba ka sorkar kam dei ban pynhap ha ka thup jong kito kiba khlad na ka khlam COVID-19, namar kam dei ka jingbakla ka iing ka sem, hynrei dei ka jingbakla jong ka Civil Hospital Shillong.