Hadien ki jingshah pynrem khlem nongrim, pynshai ka ABK Indigenous Films ia ki jingbakla ki nongkynthoh

Ka ABK Indigenous Films kaba long kawei na ki kynhun shna phlim ha YouTube ka la sngewkyndit ia ka jingsngewthuh bakla jong u paidbah uba bun balang ha kaba ia dei bad kawei na ki YouTube channel khasi kata ka ABK Channel kala thep tuh iakawei ka phlim khasi “Shaei I Mei”. Kane ka khubor kala sdang ban paw pynthei naduh ka 22 Nailar 2020 hadien ba I Bah Pradip Chullet bad ki paralok shna phlim kila ujor daka ejahar ha Sardar Police Station pyrshah ia kane ka channel.

Ka ABK Indigenous Films lyngba u Producer, u samla Bashan L Mawnai uba la pynpaw iaka jingsngew lyngngoh naduh ba jia katei ka jingjia, ula ioh ki phone call, ki messages na kylleng kiba la pynrem pynban ia u. Hynrei une u samla ula pynpaw ba ki paidbah ki la sngewthuh bakla tang na ka kyrteng bad kaba ki dei ban tip ka long ba ka channel ba u pyniaid ka dei ka “ABK Indigenous Films” hynrei kata ka channel ba ju thep tuh ia ki phlim kadei ka “ABK Channel.”

Ula pynshai shuh shuh ba um shim la don jingiadei eiei ruh bad kata ka ABK Channel. Um shym la ithuh hi ruh ia kita kiba pyniaid ia kata ka channel. Hynrei ula pynrem jur ia ka jingleh biej bad ka jinglong lyngkot jingmut jingpyrkhat kita ki ABK Channel.
U samla Bashan L. Mawnai ula pynpaw iaka jingpynrem jur ia kito kiba ju mlien ban upload kulmar ia ka video jong kiwei namar ka dei ruh ka kam kaba beain. “Bad ki para nongshna phlim baroh ki dei ban long kiba husiar namar kane ka juk teknoloji kala pynsuk bha ia ki ba thmu ban leh ia ki kam beain bad kumjuh ruh ka pynsuk bha wat ban lap ruh iakita kiba leh beain. Tang ka bor ka ain kaba lah ban khang mardor bad kaba lah ban pynshitom katkum ka Copyright Act ka ri India,” u la ong
Ka ABK Indigenous Films ka dei ka rynsan kaba la seng naka bynta ban kyntiew ia kiba don sap shisha haka kam ak phlim. Ka ABK Indigenous Films kala paw bad kiew sted bha ha ka series Ka Jingphla Na U Khynnah Mawlai -U Khun Pathaw ha u snem 2019. Bad ka la iasoh lang noh bad ka SAP Productions mynta hi u snem khnang ban dang lah ban pynkhreh pynmih shuh shuh ia ki phlim kiba thymmai.