Hiar ki Doktor ka tnat Veterinary ban pynshai paidbah halor ka jingpang Masi

Nongpoh: Ka kynhun ki Doktor na ka tnat Veterinary hapoh ka Jylla, mynta ka sngi ki la hiar sha ka shnong Sohkhwai ha Ri Bhoi, na ka bynta ban leh ai jingpynshai sha ki paidbah nongri masi hapoh katei ka shnong, ba kumno kin nang ha ka ban sumar ia ki masi ban don ia ki jingpang shitom bad khamtam eh ha kaba kum kane ka por, ba la bna paidbah halor kata ka jingdon ki masi kiba ioh ia ki jingpang ba khyllah.

Ki Doktor na ka tnat Veterinary, kiba la donlang katei ka sngi ki kynthup ia Dr. H. Kylla, DIO Shillong, nangta ka Doktor H. Kharshandi, kaba dei ka District Veterinary Officer Ri Bhoi, ka Dr. CN Sangma, Veterinary officer (Umling) lem bad kiwei ki briew na ka tnat Veterinary.

Nalor ki Doktor na ka Veterinary, la donlang ki nongialam Sengbhalang, kiba kynthup ia u Bah Luistar Lyngdoh, General Secretary FKJGP ha Ri Bhoi, u Bah Marcus Marten, President HNYF ha Ri Bhoi, nangta ki nongialam shnong lem bad ki paidbah nongri masi ha katei ka thain.

Hadien ba ka la don ka jingsaphriang khubor halor ka jingma kaba khraw ïa ki paidbah nongbam doh jong ka jylla Meghalaya, halor ka jingsdang saphriang ki jingpang khlam bapher bapher kaba la ktah ïa ki mrad kum ki masi, sniang bad kiwei kiwei, mynta ka sngi ki bor ka tnat treikam jong ka Veterinary jong ka jylla ka la shimkhia ban leit ai jingpynshai sha ki paidbah kiba ju im jakpoh da ka kam ri mrad kum ki masi, sniang halor ki lad jingïada na ki jingpang ki la sdang kynrei ha kine ki mrad.

Ka jinghiar kitei ki Doktor na ka tnat Veterinary sha katei ka shnong, ka long ruh ban ai jingpynshai halor ki lad jingiada na ki jingpang hapdeng ki mrad, la jer kyrteng kum ka National Animals Diseases Control Programme ïa kaba la pyntreikam kyrpang naduh u snem 2019 ha kaba la shimkhia ruh da u Myntri Rangbah ka Ri India u Narendra Modi, ïa kane ka prokram la pynlong hapoh ka shnong Umden La-Ang ha Ri Bhoi District.

Lyngba katei ka prokram, la lah ban pynshai halor ka jingkynrei ki jingpang hapdeng ki mrad kum ka jingpang khnap kjat bad ka jingmong ha ki shyntur jong ki masi bad ruh ka jingpang khniang lane ka lumpy skin bad ka African Swine Fever kaba la ktah ha ki masi bad sniang.