Ka sorkar ka dei ban pyrkhat kyrpang ia ki nongtrei ASHA, Aganwadi

Nongpoh:Ha ka sngi kaba ki Nongialam ka Ri Bhoi Welfare Organization (RBWO), ki la pynlong ia ka prokram kyrpang ha shnong Umsaw Nongkharai bad kata ka long ban pynkup burom ia ki nongtrei ASHA, ki Aganwadi bad nongtrei Helper jong ka koit ka Khiah, ki la pynmih ia ka sur jingdawa sha ka sorkar, ba ka dei ban pyrkhat kyrpang ia kitei ki nongtrei mon sngewbha ha ka koit ka khiah.

U Bah Eddie G. Kharbani, president ka RBWO, u la ong ba nongrim kaba la pynlong ia ki Nongialam ka RBWO, ba pynmih ia katei ka sur ban dawa sha ka sorkar, ka dei hadien ba ki la ioh jingtip ba kitei ki longkmie kiba long kum ki nongtrei mon sngewbha ha ka koit ka khiah, ki dei kiba trei shitom bad lenlade na bynta ban bha kiwei, wat hapdeng ka jingsiew kaba rit, hynrei kaba sngewsih pat ka long ba kim ioh ia kata ka jingsiew ha ka por kaba biang bad kaba la pynshem jingeh ia kitei ki nongtrei mon sngewbha.

Haba phai pat sha katei ka prokram kyrpang na bynta ki nongtrei ka koit ka khiah, ka RBWO, ka la sam Certificate sha ki katto katne ngut bad ai sngewbha da ki marbam sha ki nongtrei ka koit ka khiah jong 25 tylli ki shnong kiba don ha katei ka thain.

Kitei ki nongialam ka RBWO, ki la ong ba ka nongrim kaba la pynlong ia ki ban kynmaw kyrpang ia ki nongtrei ASHA, ki nongtrei Aganwadi bad ki Helper, ka dei namar ba ki la iohi ia ka jingtrei shitom jong ki, kiba la aiti met bad mynsiem, khamtam eh ha kaba kum kane ka por jong ka khlam COVID-19.

Ha katei ka sngi kaba ki la pynlong ia katei ka prokram ban kynmaw kyrpang, na ki nongialam ka RBWO, la donlang naduh u President ka RBWO u Bah Eddie G. Kharbani, nangta u Bah P. J Kurbah, General Secretary, u Bah Angelus Sun, Rangbah shnong Umsaw Nongkharai, ki dkhot ka RBWO, ki rangbah shnong katei ka thain lem bad shibun ngut ki nongtrei ka koit ka khiah.