Ujor ejahar ia u myntri ka koit ka khiah, ba um deng mask

Guwahati: U myntri ka koit ka khiah, la ngeit ba un dei uba kham sngewthuh ban bud ia ki kyndon ka koit ka khiah; hynrei ha Assam, ka long da khongpong.

Hynnin ka sngi, la ujor ejahar, ha Panbazaar police station, da U Tarun Dutta bad katei ka long pyrshah ia U Pijush Hazarika, myntri ka sorkar Assam, uba dei u myntri khynnah ka tnat Health & Family Welfare bad ka daw ka long ba u pynkhein ia ka kyndon jong ka koit ka khiah.

U Dutta, ula ujor ba utei u myntri, u leit ha ka jingialang paidbah, ban kanbas elekshon, khlem da bud ia ki kyndon ka COVID-19 bad ula ujor ba U Hazarika, um shym la deng mask satia ialade bad um shym la ia jngai ruh na kiwei pat ki briew.

Ha ka ejahar, U Dutta, u ong ba ia ki riew paidbah, la dain kuna khlem jingmap, lada kim deng mask bad mynta ki pulit, ki dei ban dain kuna, ia utei u myntri sorkar ruh.

U Pijush Hazarika, ula leit ha ka jingialang paidbah ha Baksa district ha ka sngi thohdieng bad um shym la deng mask bad um shym la ia shong jngai ruh bad kiwei pat, kiba don ha ka jingialang.