Poi sha ka 34 ngut, kiba khlad, kynthup 2 ngut ki longkmie kiba khlad mynta ka sngi

Shillong: U Director ka tnad ka koit ka khiah u Dr Aman War u la iathuh ba 2 ngut ki long kmie kiba don ia ka jingpang Covid -19 ki la khlad mynta ka sngi ha Nazareth Hospital bad haduh mynta ki briew kiba don ia ka jingpang Covid -19 kiba la khlad ki la poi sha ki 34 ngut ha baroh ka wei ka jylla.

U Dr War, u la iathuh ba kine ki long kmie ki ba la khlad mynta ka sngi kawei ka dei kaba la tip kyrteng kum ka Jamuna Suna 44 ka rta ka ba shong ba sah ha Pinewood Quater Wardlake bad kawei ka dei ka Anjalee Barua 60 snem ka rta ka ba shong ba sah ha Laitumkhrah . Ia ka Jamuna Suna la wan rah sha jaka sumar naduh ka 15 tarik U Nailur 2020 ha Nazareth Hospital ha ka ba la leh ia ka test bad la lap ba ka don ia ka jingpang COvid-19 la sumar ia ka ha Nazareth Hospital hynrei ka la khlad noh ha ka 18 tarik u Nailur 2020 ha ka por kumba 9 :20 mynstep na ka jingshitom Covid -19, Amenia bad ka dei ruh ka ba don ia ka jingpang Hypertention bad hypothyroism.

Ia ka Anjalee Baruah la wan rah ha Nazareth Hospital ha ka por kumba 12:45 baje mynsngi hadien ba ka la kyllon ha ing; hynrei ha ka por ba la poi ha Hospital la shem ba ka la dep khlad shuwa ban poi ha kane ka jaka sumar. Na ka liang jong ka Hospital ka la leh ia ka test bad la shem ba ka don ia ka jingpang Covid -19 . U Dr War u la iathuh ba ia kine arngut ki ba la khlad mynta ka sngi yn sa kyntiew ia ki kyrteng jong ki bad ki briew kiba khlad na ka jingpang Covid-19 lashai ka sngi.