Kam ka China, ba ki shipai jongka, ki duna kiba iap, ha ka jing ialeh ha Galwan

Ka China, ka pynshai mynta ka sngi, ba ki shipai jongka, ki iap tang khyndiat ngut eh, ha ka jing iakhun pyrshah ia ki shipai India, ha U Jylliew ba ladep, ha Galwan. Katei ka dei katba kum ka jingthoh jong U Editor ka Global Times, kaba dei ka kotkhubor jong ka sorkar China bad u kyntait ruh ia ka jingkren jong U Rajnath Singh, myntri kam iada ri ka sorkar India, ong ka khubor jong ka India Today, kaba la pynmih mynta ka sngi.

Katei ka paw shai ba ka China, ka la pdiang mynta, ba ki shipai jongka, ruh ki la iap ha ka jingiakhun bad ki shipai India ha U Jylliew, ha kaba 20 ngut ki shipai India, ki la iap ha katei ka jing ialeh thma ha Galwan bad sa shibun kiwei pat kiba mynsaw.

U Editor ka Global Times, U Hu Xijin, ha ka tweet jongu, u thoh “Katba nga tip ma nga, ka jingiap ki shipai China ha Galwan, ha ka 15tarik Jylliew, ka dei kaba khyndiat bha, na kaba iap ki shipai India, kaba haduh 20 ngut. Nangta la iathuh ruh ba ki shipai China, kim shym la shah kem satia ha ki shipai India, katba ki shipai India, ki bun kiba la shah kem ha ki shipai jong ka China”.

Katei ka tweet jong U Editor ka Global Times, ka dei halor ka jingkren jong U Rajnath Singh, hynnin ka sngi, ha kaba u kam ba ka China, ka la duh ia shibun ki shipai jongka, ha ka jingialehkai bad ki shipai ka India, ha U Jylliew ba ladep.

Haba jubab ha Parliament, U Rajnath Singh, u iathuh ba ha ka jing ia kynad, ha ka 15tarik Jylliew 2020, ki shipai India, ki la duh ia la ka jingim jongki bad ki shipai China ruh, ki la duh shibun ki shipai ha ka jingialeh.

Ka jing iakhun, kam shym kut tang ha U Jylliew, hynrei, ha ka 8tarik Nailur 2020, ruh ka la don biang ka jing ia siat jong kitei ki arliang mamla ha ki bynta jong ka Ladakh.