Halor ka Fish Market ha Saiden, shah takrain ki ophisar ha ki MLA Congress

Nongpoh:Ki MLA ka Congress kiba dei ruh ki dkhot ka Public Account Committee (PAC), myn hynnin ka sngi ki la hiar sha shnong Saiden ha Ri Bhoi, na ka bynta ban leit wad jingtip halor ka jingtrei kam ka Fish Market ne ka Iew Die Dohkha kaba don ha Saiden.

Lah ruh ban kdew hangne, ba katei ka Fish Market kaba don ha Saiden, la tei ha ka jinglut kaba la kot haduh T. 1. 64 Klur bad kaba plie ha u snem 2018, ha kaba ka jingthmu ka Sorkar ban buh ia katei ka Fish Market, ka long ban kyntiew ia ki Nongri Dohkha bad ha kajuh ruh ka por ban kyntiew Ia ka kam shalan Dohkha na Meghalaya sha kiwei pat ki jaka.

Haba kitei ki dkhot ka PAC bad kiba dei ruh ki MLA Congress, kiba kynthup ia ka Kong Ampareen Lyngdoh, u Bah HM Shangpliang, u Bah Mayrald born Syiem, ka Miani D. Shira bad kumjuh ruh ka Kong RM Kurbah, DC Ri Bhoi, ki leit ban jurip ia katei ka Fish Market, ki la lap ba kat haduh mynta kam pat la treikam satia bad ym don wat tang kawei ruh ka Dohkha ha katei ka jaka.

Ban tip halor ka jingbym treikam katei ka jaka, kitei ki MLA Congress, ki la wad jingtip ym tang na ki ophisar ka tnat Fisheries, hynrei ki la wad jingtip na ki nongialam shnong ka Saiden, na ka bynta ban tip ia ka daw halor ka jingbym lah ban pyntreikam janai Ia katei ka Fish Market.

Ha ka jingiakren kaba la neh kumba shi kynta tam, kitei ki MLA Congress, ki la kylli Ia shibun bah ki jingkylli na ki Ophisar ka tnat Fisheries, hynrei ka jubab kaba ki ioh na kitei ki ophisar, ka long ba ka daw hi kaba ym lah ban pyniaid Dohkha ha katei ka Iew, ka dei namar ba duna palat ka jingpynmih Dohkha da ki nongri Dohkha bad haba kitei ki nongri Dohkha ki pynmih Dohkha, kim ju rah sha katei ka jaka, hynrei ki la shu kut tang ha kaba die ha shnong ha thaw.

Kumta haba la sngewthuh ia ka jingbym lah ban pyniaid Iew Ia katei ka Iew Die Dohkha, kitei ki MLA Congress ki la ai jingmut ia ki ophisar ka Fisheries bad ruh ia ki Nongialam shnong ka Saiden, ba kan bha ban aiti noh sha ki Society, khnang ban lah pyniaid ia katei ka Iew Dohkha bad ban lait na ka jingsepei.