Ka khlam corona, ka la nang pur nang pur ha kine ki sngi bad ka jing ainguh jong u paidlang ka Ri, ka dei ban long sha U Blei nongbuh nongthaw, namar ba katei ka jingpang, kam shym la leit pur satia sha ki nongkyndong; hynrei te la mih ka jingshong syier kaba khraw, ha u duk u raitoi.
Haduh mynta, ngi iohi ba katei ka khlam, ka sdang leh tyngeh, tang ha ka karkhana Star Cement ha Lumshnong bad lait nangta, kam don satia kano kano ka shnong ha Ri Khasi Jaintia, kaba la shah sangoh jubor ha katei ka khlam, lait noh tang ha ki jaka sor, ha kaba ka la rung sha man ki paki dulan jong ki riew paidbah bad mynta la iohi, kumba ka la sdang ban rung sha ka ki paki dulan jong ki heh ki hain.
Khyndiat taiew mynshwa, ka la rung sha Meghalaya High Court, ha kaba ki la don bun ngut, kiba ioh ia katei ka jingpang; nangta ha ki khyndiat sngi mynshwa, ngi iohi, ba ka khlam ka la rung ha Meghalaya Secreteriat bad ka la ioh ban pynbit jingpang, ia ki phew ngut ki nongtrei ha katei ka ophis ba heh duh ha ka Jylla; hynrei hynnin ka sngi, ka la leit poi syndon ha Raj Bhavan bad la iohi, ba kiba bun ki nongtrei U Lat, ki la ioh ia katei ka jingpang bad la sngewthuh, ba tang U Lat, uba dang lait met haduh mynta.
Ka daw jong ka jingrung ka jingpang, ka la eh namarkata, namar kumba la iakren ia kajuh shi kajuh, ka long ba ki nongkyndong, kim deng mass, kim ia jngai, kim sait kti, hynrei kim ioh jingpang, katba ha Secreteriat, ha shwa ban rung la hap thoh kyrteng, la shah thew jingshit, la hap sait kti, la hap deng mask bad hap ia iaid jngai iwei ia iwei pat; hynrei ki nang bun pynban kiba ioh pang bad kaba kham lyngngoh, ka long ba ha Raj Bhavan, kam dei ka jaka ia rung ia mih paidbah, hynrei ki don haduh 30 ngut kiba ioh pang bad katei ka pyni, ba ka jing ia bit jingpang, ka dei ha ki para nongtrei hi bad katei ka pyni, ba katei ka ain jong ka koit ka khiah, kam trei kam satia, ha katei ka ophis jong U Lat ka Jylla.
Ki jing shisha, ki la nang kdew, ba nangne shakhmat, ngim lah shuh ban iaid lait na ka khlam corona virus, hynrei ngi la hap ban shu husiar ialade shimet shimet, namar ba lada ha Raj Bhavan bad ha Secreteriat, kim lah shuh ban khang ia katei ka khlam, kumta ka jing khmih lynti ba u bym don lad ban thied mask lane u bym don jing saitkti, un iada ialade, ka long ka bym lah long satia bad kaba kut, kan long tang ka jing sumar synei jong U Blei na jrong.
“Duk suk riewspah jynjarrr trah” ka dei ka ktien tymmen, kumjuh ka ktien Blei rh hi ka ong “Suk uba duk ha ka mynsiem ” sa bishar hi sa ma phi
“Duk suk riewspah jynjarrr trah” ka dei ka ktien tymmen, kumjuh ka ktien Blei rh hi ka ong “Suk uba duk ha ka mynsiem ” sa bishar hi sa ma phi khublei shibun