Naduh 1tarik Risaw, yn plie ia ki iingmane Presbyterian ha Khasi Jaintia

Shillong:Naduh ka 1tarik Risaw, yn sa ioh sngew biang ia ka jingtied ki baje ha ki iingmane jong ka balang Presbyterian ha Khasi Jaintia.

Katei ka dei halor ka rai jong ki nong pyniaid jong ka KJP Assembly, ha kaba yn plie noh ia ki iingmane naduh ka 1tarik u bnai u ban wan. Katei ka rai, ka mih ha ka jingialang jong ka Working Committee jong ka Assembly, kaba long mynta ka sngi.

U Senior Administrative Secretary jong ka KJPA, u Rev P.Hynñiewta, u iathuh ba baroh ki Balang jong ka Presbyterian kin plie ia ki Ïing mane, naduh ka 1 tarik u risaw hynrei ki dei pat ban bud ia ki kyndon jong ka Ministry of Home Affairs ka sorkar India.

U Pastor Hynñiewta u la ong ba ia kane ka rai jong ka Assembly kin pyntip sha ka sorkar lashai ka sngi ba kan long tang kum ka jingpyntip.

Ka Balang Presbyterian ka la pyntip sha baroh ki Synod naduh ka Synod Sepngi, Mihngi bad kumjuh ruh ka Ri-Bhoi ba naduh ka 1 tarik ki dei ban plie noh ia ki Ïing mane, hynrei kin hap ban bud ryntih ia ki kyndon.