Ka Dorbar ki Khasi Hyndai

Babu Kular Khongjirem

[ba bteng]

Kumta,ngi iohi ba ka dorbar ki Khasi hyndai kadei shisha kaba khuid tam,kaba shisha(khlem don jingleh thok),ka bym aili ia uno uno uba sngew khraw ne uno uno uba leh khraw tang ban ioh leh bein ia kiwei kiba kham rit bad kham duna.

Wat u syiem hi ruh um ju nud ban kren bakla ne kren thok ne kren bein iano iano.Kynja uba pynpaw jingbitar ne kren ki ktien sniew ne kren bein iano iano ha ka dorbar kata,ki shu kynshi kyneh bad lada donkam, kim shah kiew dorbar shuh(suspension) lano lano ruh.Ha ka Dorbar,ym ju bit ban shu leh bor ne thom bor.Ym ju bit ruh ban shu kren nangang,kren ar sap ne kren khun ranap,baroh ki ia kren bin pa bin ia kaba dei suda.Dei na kata ka daw ba, ka Dorbar ki Khasi hyndai la ju khot ia ka kum ‘ka dorbar Blei.’ Don shisien hana, ba uwei u syiem hyndai u leh bakla haba u kren ha ka dorbar,kumta, uwei u briew uba kyrteng u Pdah jait Umdor u la ong ia uta u syiem kumne: ‘Ban kum maphi ,ngi thung da u maw ruh bit”.Kane ka pyni ia ka jinghiar dor bad poh kyrdan u syiem uba nud ban shu leh donbor katba mon ia u paidbah namar um dei satia ban leh kumta. Sngap mynshwa ha ka dorbar, tang ban pyn saw reng khmat eh ruh kalong kaba tam eh.Ba phin kren lamler ne kren heh ne kren bitar ne buaid lei lei ha ka dorbar,kata,kin shu ong beit,’ To khat da u prah,wat ktah da ka kti ruh,shu khalah noh shapoh kharai’.

Kane ka mut ka jinglong poh dor jong uta u briew kat haduh ba kim dei shuh wat ban pyndei da ka kti ruh(namar ki la khein ia u kum ka jaboh/jakhlia ka bym nud pyndei kti shuh).Kata ka dei ka dorbar u khasi hyndai ka bym ju bit kylla tdong tdong -khlieh khlieh.Uno uno uba pynkhein ia la ka kular,u iuh hi,u pap hi,u thar hi,u nguid hi ia la ka prie namar bym mane ia ka jutang bad ka hukum jong ka dorbar. Ngi iohi namarkata,ba ka dorbar mynshwa ka iapher shisha na ka dorbar ka juk mynta.Mynta,ki kwah long syiem,long sordar bad rangbah shnong ban ioh leh bor thom bor bad leh kput ha ban da biang hi jai ia kito kiba ki shan khmat.zKi kwah syiem,sordar ne rangbah shnong tang ban ioh jingmyntoi shi met shi met.Ki dei ‘ki syiem ne sordar Scheme’ U syiem uba ju ong barabor ba u bat ia ka riti ka dustur u leh be riti be dustur suda pynban ha ban da biang ia ki shnong ki thaw..Kat sha ba thiah ka mon ne ia jan,shata u pynsan khlem nongrim hana,ba ka dei kaba hok bad shisha.Ki sordar ne rangbah shnong lei ki rai stad na rieh na rieh ki tieng ioh tip u paidbah khnang ban ioh myntoi ma ki.Ki kput artad sia ban beh shnong,pynduh khaw ration ne ym shah bylla 100 sngi ha shnong ha thaw.Ki la ia plan duman lypa bad ynda poi ha dorbar ki shu pyn kohnguh beit ia ki paidbah ba ki phah wan dorbar tang ia kito kiba kyrshan ia ki.

Dei kane kein ka juk ha kaba ki kam syiem,ki kam sordar ne rangbah shnong ki la kylla politic lut.,ki dei ki syiem bad sordar politics suda.Katba kylla ka potitics,ki rruh ki kylla lang kumta..Hangno shuh kein,kan bha ne shong suk shong sain ka shnong ka thaw ne ka it ka hima?Ka la poi ka kuli juk kumba ong ki longshwa man shwa.(next issue,pule ki jubab jong ki jingkylli)