Kynduh DMHO ka KSU ba thmu wengkam jubor ki bor shnong ka Nongsier ia kawei ka Nongtrei ASHA

Nongpoh: Ka khubor kaba la saphriang halor ka jingshah halor ka jingshah wengkam ia kawei ka Longkmie kaba dei ruh ka Nongtrei ASHA, hynnin ka sngi ki nongialam ka KSU Western Border Area, kaba la ialam da u Samla Receive Pator, President, nangta u samla Lumjingshai Syngkli lem bad kiwei, hynne ka sngi ki la leit ban kynduh ia u Dr. M Mawrie, DMHO ka Ri Bhoi, kata ka long ban kyntu ia utei u DMHO ba um dei ban pdiang ia katei ka jingthmu wengkam da ka shnong Nongsier ia katei ka Longkmie bad kaba dei ka Nongtrei ASHA.

Haba iadei bad katei ka jingleit kynduh DMHO, kitei ki nongialam ka KSU, ki la phah ruh da ka jingthoh, kaba long kum ka jingdawa na ki bor ba deipeit jong ka koit ka khiah ba kim dei ban wengkam ia katei ka Longkmie, hynrei ki dei ban buh beit ha ka jaka kaba ka trei kum ka Nongtrei ASHA hapoh ka shnong Nongsier, kaba dei kawei na ki shnong nongkyndong kaba don ha ka thain Jirang ha Ri Bhoi.

Halor katei ka jingshah weng jubor ia katei ka Longkmie kim ka Nongtrei ASHA, u samla Receive Pator, u la ong ba ka seng kam lah ban pdiang halor katei ka jingleh donbor da ki nongialam shnong ka Nongsier.

Utei u nongialam ka KSU, u la ong ruh ba ka daw hi kaba la pynlong ia ki nongialam shnong Nongsier ban weng noh ia katei ka Longkmie kum ka Nongtrei ASHA, ka dei tang na ka daw ba katei ka Longkmie, ka la iarap ia kawei ka samla ba duna dkhot met, kaba la kynnoh ba ka la shah leh beijot haduh ban da armet ha uwei pat u briew na katei hi ka shnong bad uba don ka jingiajan eh bad ki nongialam shnong Nongsier, namar katei ka Nongtrei ASHA tang mar ia tip halor katei ka jingjia, ka la leit ban ialam mar ia katei ka samla sha ka jaka sumar kaba don ha Patharkhmah.

Kumta haba iadei bad katei ka kam kaba la leh da kitei ki nongialam shnong Nongsier, ki nongialam ka KSU, kiba la thmu wengkam ia katei ka Nongtrei ASHA, na ka liang ka seng, ka dawa na u Dr. M Mawrie, ba um dei ban ailad, hynrei ban pynneh beit ia katei ka Longkmie kum ka Nongtrei ASHA bad katno tam ha kaba kum kane ka por, ba ki Nongtrei ASHA, ki la dei kiwei na kiba mih shakhmat ban iakhun pyrshah ia ka khlam COVID-19, u la bynrap.