Nongpoh:Ha ka sngi kaba la pynskhem ia u Bah Pholding Makdoh kum u Acting Sordar ka Raid Madan Kyrdem, kum la bthah da ka KHADC bad u Syiem ka Hima Khyriem, kata hadien ba la shah weng kam noh shipor (Suspend) ia u Bah R.M Dorphang, Sordar barim jong katei ka Raid, ki Rangbah shnong na ki 15 tylli ki shnong kiba hap hapoh katei ka Raid, ki la ong ba ka nongrim kaba hakhmat eh kaba la pynlong ia ka KHADC bad Hima Khyriem, ka dei ba u Bah R.M Dorphang, u la pyndonkam bakla eh ia ka bor bad ba um shym la khein snep shuh ia ki rangbah shnong, ne u la shu leh donbor eh shimet.
Ki nongialam katei ka Raid, kiba kynthup ia u Bah Jibansius Ramshong, u Secretary ka Raid, u Bah Amberlight Masharing, u Bah Aris Ryngkhang, Rangbah Shnong ka Mawnohsynrum lem bad kiwei, ki la pynshai paidbah, ba ka ka Raid ka la hap ban pyntreikam lyngba u Acting Sordar, namar u Sordarr barim jong katei ka Raid, um burom ne niewkor ia ki riti ki dustur jong ka synshar khaddar bad kaba la pynlong ia u ba un shah sloit syndon ia na ka khet Sordar.
Ki la iathuh ruh, ba dei halor ka jingpynkhein da utei u Sordar barim ia ki riti ki dustur bad ka rukom synshar khadar, ka la pynlong ia ki nongialam ka Raid ki la hap ban ujor haduh 3 sien kynthih sha ka KHADC bad sha ka ophis u Syiem ka Hima Khyriem, na ka bynta ban dawa hiar khet ia utei u Sordar bad ban thung Acting noh da uwei.
Shuh shuh, kitei ki nongialam Raid, ki la iathuh ruh ba ha ki por mynshwa ym ju don kata ka jingkynrum kynram hapoh ka Raid, ha kaba kitei ki shnong kiba hap ha katei ka Raid ki shongsuk shongsain khlem kino kino ki huri hura, pynban naduh ba u Bah R.M Dorphang, u la shimti kum u Sordar, ba la mih shibun ki kynrum kynram ha kiba biang ki liang bad kaba la pyndkhoh ruh ha ka synshar khaddar hapoh katei ka Raid.
Haba iadei bad katei ka jingshah pynskhem kum u Acting Sordar, u Bah Makdoh kum u Acting Sirdar ka Raid Madan Kyrdem, u la ong ba ka jingshimti ka jong u ia katei ka khet, ka long hadien ba la aibor ne pynkhamti da ki bor jong ka KHADC bad Syiem ka Hima Khyriem, uba la ong ba u kloi ban pdiang ia kano kano ka jingbthah na kiba halor, la kin pynneh ia u ne kin weng ia u lada ki lap ba u leh ia kaba pyrshah ha kaba pyniaid ia ki Ri Dustur.
Phi don ban ong eiei?