Kit briew ruh em, kit mar ruh em; pyneh tding ka RDA ban wan ka rel sha Shillong

Shillong: Na ka liang jong ka Regional Democratic Alliance kaba kynthup ia ka HSPDP bad ka UDP, ki pyrshah ia ka jingwan poi jong ki Rel kit briew ki ban wan shaduh ka nongbah Shillong, hynrei ka RDA ka kyrshan lada ka Rel kit mar kan wan tang ha Khanapara.

Haba ia kren bad ki lad pathai khubor u bah Jemino Mawthoh, General secretary jong ka party United Democratic Party u la ong ba ha ka 24 tarik u Nailar ki la wan ban ia kynduh ia u Myntri rangbah ka jylla u Conrad K Sangma ban pynpaw ia ka jingpyrshah ia ka jingwan jong ka lynti rel sha kane ka jylla.

U la ong ba ka ne ka jingpyrshah ia ki Rel Kit briew ka long namar ba na ka liang ka sorkar jylla kam pat lah ban pynbiang ia ki tiar ki tar ban khang lad ia ka jingwan rung kyrthep jong ki briew ki ba na bar ka jylla. U la ong ruh ba ha ka ba iadei bad ka rel kit mar na ka liang jong ka RDA kin pdiang ia ka Rel kit mar lada ka wan tang ha Khanapara,hynrei kin pyrshah lada ka wan shaduh ka nongbah Shillong.

U bah Jemino u la ong “Ka Rel kit tiar kum ka party ka pdiang ba kan long tang ha Khanapara , lada ka Rel kit tiar kan don hapoh ka jylla kan iarap ha ka khaii pateng bad na ka jingshah pyndik ha ki briew jong ka jylla Assam, hynrei ka RDA ka pyrshah lada wan rah ia ka Rel kit tiar haduh Shillong kumba la dawa da ka party BJP, ka jingpyrshah ka long namar ka jingbym biang ka jaka, ka jingbun briew bad kam long ruh ban poi ha Shillong.”