Kaei kata ka Arunachal Pradesh, dei ka South Tibet, ong u nongkren ka China

Ka China mynta ka sngi, ka pynpaw ba kam ithuh satia ia kata ka jaka, kaba khot Arunachal Pradesh, hynrei, ka ong ba ka dei ka bynta jong ka South Tibet. Katei ka dei ka jubab jong U Zhao Lijian, uba dei u nongkren jong ka tnat bar ri ka China mynta ka sngi.

Haba ki nongthoh khubor, ki la kylli jingkylli, halor ka jingjah jong ki san ngut ki briew na Arunachal Pradesh, U Lijian, u ong ba um tip satia ia kata ka jingthoh jong ki shipai ka India sha ki shipai China jong ka PLA, ba ki don ki briew kiba jah ha katei ka thain bad u kyntait ruh ba ka don kano kano ka jingshah rahbor jong ki nong India, ha katei ka thain.

La sngewthuh ba kitei ki nong Arunachal, kiba jah, ki dei kiba ialam lynti ia ki shipai India sha katei ka Upper Subansiri District, kaba don sha khappud jong ka China bad ka India.

Kiba la shah rahbor, ki long U Toch Singkam, U Prasat Ringling, U Dongtu Ebiya, U Tanu Baker bad U Ngaru Diri. Kitei la iathuh ba ki leit beh mrad sha katei ka thain, hynrei ki la shah rahbor noh ha ki shipai PLA jong ka China.

Ar ngut na kitei kiba ia leit lang, ki wan phai noh sha iing bad iathuh ia ka jingjia ba ki la shah rahbor kitei ki san ngut, na Sera-7, kaba dei ka jaka pahara jong ki shipai India, kaba don kumba 12 kilometre shatei jong ka Nacho.