Shillong: Namar ba bun palat kiba ioh iabit ia u khñiang jingpang COVID-19 ha Jail Road, bad ban tehlakam ia ka jingsaphriang jong une u khniang jingpang, ka District Magistrate jong ka East Khasi Hills District, mynta ka sngi ka la pynbna ba baroh ki dukan bad ki jaka trei ha kine ki jaka yn khang shuwa shipor naduh Jail Road Filling Station haduh Hotel Polo Towers naduh ka 5 baje mynstep jong ka 6 tarik Nailur 2020 haduh 5 baje mynstep jong ka 9 tarik u Nailur 2020.
Yn nym shah iano iano ban pynlong ia kano kano ka kynja jingialang ba har rukom, bad baroh ki dukan bad ki jaka trei ki dei ban khang noh mardor bad ki jaka ai jinghikai jong ka sorkar ne ki riewshimet kiba don ha katei ka jaka kin nym shah ban plie.
Katkum ka order, u Incident Commander, Zone-III, un long u Supervising Officer ia katei ka jaka naduh Jail Road Filling Station haduh Hotel Polo Towers .
Kane ka order kan nym treikam ia ki nongtrei ka koit ka khiah, ia ki nongtrei ka Shillong Municipal Board, ia ki press, ia ki dukan dawai bad ia ki bank.
Phi don ban ong eiei?