Shillong: U Symbud myntri rangbah ka jylla u bah Prestone Tynsong, u la iathuh ba ha ka jingialang kaba la long mynta ka sngi la shim ia ka rai ban pynkhuid bad synreit dawai ia ka ophis jong ka Meghalaya State Secretariat bad ia ka Additional Secretariat ha kine ki ar sngi kata ha ka 5 tarik u Nailur 2020 bad ha ka 6 tarik u Nailur 2020 .
U symbud myntri rangbah u la iathuh ruh ba kum ka lad ban iada na ka jingsaphriang jong kane ka jingpang Covid -19 ka Sorkar ka la shim ia ka rai, ban khang ia ki riewpaidbah ba kin wan sha kine ki ophis naduh ka 7 tarik u Nailur 2020 haduh ka 11 tarik u Nailur 2020.
Haba ia kren bad ki lad pathai khubor na ka liang u bah Prestone, u la iathuh ba ka rai ban phah synreit dawai, ban pynkhuid bad ban khang ia ki riew paidbah ban wan sha kine ki ophis jong ka Secretariat ka long hadien ka jingioh Covid positive jong ki 6 ngut ki nongtrei kiba trei hapoh kitei ki Ophis.
Haduh mynta ka sngi 6 ngut ki briew ki ba trei ha ki tnad jong ka Finance ka tnad jong ka Law bad ka tnad jong ka IPR kaba don hapoh jong ka Secretariat ki la test Covid Positive ha kaba mynta ka sngi ia kine ki tnad sorkar la khang dam shipor.
La iathuh ruh ba na kine ki 6 ngut ki nongtrei jong ka Secretariat kiba la test COVID -19 ki don haduh 65 ngut ki High Risk Contact jong ki bad na kine 30 ngut na ki la dep ban leh ia ka jingtest bad baroh ki long negative, katba ia kiwei pat yn dang leh ia ka test mynta ka sngi.
Phi don ban ong eiei?