Thep ia ki shini reshon ha byrni dewbilat, lap U Mukul

Shillong, 11 Nohprah:
Palat 33,000 tylli ki aplikeshon na ka bynta ban ioh ia ka skhim kyrpang jong u myntri rangbah lane ka Chief Minister’s Social Assistance Scheme ka sorkar ka la ioh pdiang, hadien ba la pynrung kyrteng ia ki paidbah ha kylleng ki Block kiba don ha ka jylla, bad ia ka pisa la mang ban ai sha kitei ki nongioh jingmyntoi lyngba katei ka skhim na bynta ki hynriew bnai, kata naduh U Jylliew haduh U Nohprah 2014.
Ia kane la pyntip da u myntri rangbah ka jylla u Dr.Mukul Sangma ha ka prokram kaba la pynlong da ka tnad Social Welfare ban sam ia ki cheque sha ki nongioh jingmyntoi lyngba ka skhim iathoh shongkurim na ka bynta ki kynthei khunswet, hapoh ka Chief Minister’s Wedding Assistance Scheme for Orphan Girls bad ka Chief Minister’s Social Assistance Scheme kaba la pynlong mynta ka sngi palei ha Ampati kaba dei ruh ka sngi pynkut ia ka tamasa Dimchrang 2014.
Ia ki cheque sha ki nongioh jingmyntoi la sam da u myntri rangbah ryngkat ki Parliamentary Secretaries ba kynthup ia U WD Sangma bad u Limison D. Sangma, u Deputy Commissioner u Ram Singh, u Director ka tnad Social Welfare, u bah HM Shangpliang, u MDC ka Ampati u N. Koch bad u IGP ka Western Range u bah H. Nongpluh. Ki la sam ia ki Cheque sha ki paidbah jong ka Betasing bad Zikzak ICDS projek kiba dei ban ioh jingmyntoi lyngba katei ka skhim. La sam shini ruh sha kiba dei ban ioh lyngba ka skhim Public Distribution Scheme (PDS) ha katei ka juh ka sngi.
U myntri rngbah ka jylla u la ong ba ka jingsam jingiarap ia ki kynthei khunswet da ka skhim ia thoh shongkurim, ka dei ba kin lah ban im suk im sain ha ka jinglogn riew blei ha ka longing longsem jong ki ryngkat ki ba ieid jong ki. U la ong ba wat la katei ka jingiarap na ka sorkar ka long kaba rit, hynrei ka dei pat ka jingpyni ia ka dak ba ka sorkar kam shym la iehnoh bad kam shym la klet ia kiba donkam ia ka jingiarap.
U MR u la ong ruh ba kham mynshuwa ha ki snem kiba la dep la mih bun ki jingujor na ki paidbah ba ki shini ba ki ioh ka bthuh dew bilat, bad hadien ba la tohkit la lap ba ia ki shini la thep hapoh byrni dewbilat, kumta ka sorkar ka la hukum ba ka rukom thep ia ki shini ka dei ban long kaba khuid ban lait na ki jingjaboh. U myntri rangbah, u la sam sha ki paidbah ia ka shini kaba shongdor T.13.50 tyngka shi kilo. U la maham sha ki nongdie rashon ba kim dei ban die tam ia ka dor kaba la buh ban die sha ki paidbah, u la ong ba ki nongsam rashon ki dei kiba shakri paidbah ym na bynta ka jingmyntoi shimet jong ki.