Bym lah iapynbeit, kiew iinglieh iingsaw ki ar-kynhun na ka Balang Presbyterian Umran Dairy

Nongpoh: Ka Balang Presbyterian Umran Dairy Nongthymmai District, ka la mih shakhmat ban pynshai paidbah halor ki kynthoh khlem nongrim da u Bah Drestalwell Marbanniang, Secretary Balang Presbyterian Umran dairy Umsning District, da kaba ki la kynnoh kylla ba katei ka jingkynthoh da utei u nongialam Balang, ka dei kaba khlem nongrim haei haei ruh em, hynrei ka la kylla long pynban ka khubor kaba la ialam bakla ia ki riewngeit ka Balang Presbyterian bad ia ki nongpule kot khubor.

Ha ka kyrwoh kaba la phah sha ki lad pathaikhubor, u Bah Donborlong Kharmuti, Secretary ka Balang Presbyterian Umran Dairy Nongthymmai District, Mawbuh Presbytery, KJP Synod Sepngi, la ong ba katei ka jingkynthoh da u Bah Drestalwell Marbanniang, ka long ka bym don nongrim, namar katkum ka jingkynthoh jong u, la kdew ba ka Balang Presbyterian Umran Dairy Nongthymmai District, ka dei kaba dang thymmai bad kaba dang shu seng shen, hynrei ha ka jingshisha hi ia ka Balang Presbyterian Umran Dairy Nongthymmai District, ka dei kaba la seng naduh u snem 1971 bad la thung kum ka Balang kaba pura ha ka 28/4/1985.

U Bah Donborlang Kharmuti, u la kdew ruh, ba katkum ka jingpynshai da u Bah Drestarwell Marbangniang, uba la ong ba ka jingbymshah tep ia I khunlung hapoh u Lum Jingtep ka Balang Presbyterian Umran Dairy Umsning District, ka dei ka jinglamler da utei u rangbah, namar ka Umsning District kam shem don Lum Jingtep hapoh ka shnong Umran Dairy.

Katei ka kyrwoh ka la kdew ruh ba ka Balang Umran Dairy bad ka Balang Nongthymmai ki dei na kajuh ka District bad kiba hap hapoh ka Nongthymmai District, hynrei ka Umsning District ka dei kaba don ia 3 tylli ki Balang, kiba kynthup ia ka Balang Umsning, Balang Umdiker bad ka Balang Kyrdemkulai, pynban katei ka kynhun kaba la ialam da u Tbn. G.T Lyngdoh bad u Bah Drestarwell Marbanniang kum u Secretary, ka dei ka kynhun kaba ki la shu kwah ban pyniasoh jubor sha ka Umsning District bad kiba la ialeh pyrshah ia ka jingpynbeit jong ka Mawbuh Ri Bhoi Presbytery.

Ka jingleh donbor da katei ka kynhun kaba la ialam da u Tbn. G.T Lyngdoh bad u Bah Drestarwell Marbanniang, ki la iai paw pyrthei ha kine ki snem kiba la leit noh baroh, namar ha ka 31/12 u snem 2018, ka Presbytery ka la phah ia ka shithi ban ym shah rung briew shuh hapoh ka Iingmane ka Balang Presbyterian ha Umran Dairy, pynban ka kynhun kaba la ialam da u Tbn. G.T Lyngdoh bad u Bah Drestarwell Marbanniang, ki la leit ban rung jubor bad kiba la rah Lama iong ha ka Presbytery kaba la long hapoh ka Balang Nongrim Umpowin bad khang ruh ha ka ban tep ia iwei I khunlung bad kawei ka longkmie hapoh u Lum Jingtep Balang.

Namarkata, halor kitei ki kam pynibor da katei ka kynhun, kaba la ialam da u Tbn. G.T Lyngdoh bad u Bah Drestarwell Marbanniang, ka la pynlong ia ka Balang Presbyterian Umran Dairy Nongthymmai District, kaba la ialam da u Tbn. P. Mynsong ba kim banse ban iaid noh sha ki bor ka Ain, namar ka jingiapynbeit mynta la 5 snem kam shym la poi shano shano ruh.