Shyrkhei ka jing bamsap na ki Painkhana ha shnong Sohmynting

Jowai: U ma Dapoi Pyrtuh uba dei u nongshong shnong ka shnong Sohmynting, West Jaiñtia Hills District haka jingleit wad jingtip jong u lyngba ka RTI naka Ophis jong ka tnat Public Health Engineering RWS Division, West Jaintia Hills, Jowai, halor ka jingpyntrei iaka skhim paiñkhana da katei ka Ophis lyngba ka scheme Swatch Bharat Mission u la lap ba haduh da ki phew lak tyngka ka la paw ba ka don ka jyrsieh bamsap na katei ka skhim, namar ba u paidbah um shym la ioh myntoi katkum ka hok ba la mang kyrpang ia u na katei ka skhim wat lada ki paw ka kyrteng bad soi kyrteng tuh bad soi thok da u Monjyrlang Lyngdoh uba dei u Chairman ka Water and Sanitation Committee katei ka shnong.

Katkum ka RTI ka mang tyngka halor katei ka skhim naka bynta ban pynioh paiñkhana sha ki paidbah haka shnong Sohmynting ka long 12000/- tyngka naka bynta kawei kawei ka longiing bad kumba 381 tylli ki longiing ki dei ki nongioh myntoi.

Ia kane ka skhim la peit bad pyntrei da u Mynjurlang Lyngdoh uba dei u chairman ka Village Water and Sanitation Committee, bad naka liang ka ophis kala pyllait lut baroh katei ka pisa naka bynta ka hok u paidbah bad ka khlem supply ruh ia kino kino ki tiar.

Kumta lyngba ka RTI la lap ba ula thok bad shukor ia ngi ki paidbah nongshong shnong kiba duna ka jingnang jingstad, namar ba na katei ka pisa 12000/- tyngka baka ophis kala pyllait naka bynta ka jingmyntoi u paidbah ba kin ioh iaka paiñkhana kaba kham bit kham biang, kaba long ruh shi bynta ka jingiaid lynti sha ka thong jong ka sorkar ban kyntiew iaka rukom im jong ngi ki paidbah nongkyndong, hynrei pynban na katei ka 12000/- tyngka don ki longïing ba u ai 6000/- hajar ryngkat bad wei ar ki tiar, don kiba u ai duna na ka 6000/-tyngka, nangta don pat kiba ioh tang ka pisa khlem ki tiar,don ruh ki ba ioh tang ki tiar khlem ka pisa, bad don ruh ki bym ioh ei ei napdeng kine ki 381 ïing, kaba la wanrah ia shibun ki kynrum kynram bad jingbymshai u paidbah.

Kumta khlem da lum jingkheiñ bniah iaka jingshah bam klop jong kawei pa kawei ka longiing ba ioh myntoi ruh ka jingbam sap ba la shai kdar bha lyngba ka RTI kala poi daki phew lak tyngka, namar napdeng ki tiar shna paiñkhana ba kynthup kum ki Indian pan, Zyphone, Footrest, pipe ‘6×4’, pipe ‘6×3’, bend, tee, Reducer Socket, Covel, Dusbin, Rot, Cement, G.I.Sheet u ai jingthoh sha ka ophis ba ula dep ai lut baroh shaki paidbah hynrei katkum ka jingshisha don kiba ioh don ki bym ioh napdeng kine ki tiar.

Nalor kitei ki tiar ka jingshah bam klop ne bamsap ba la tikna bha bala poi daki phew lak dei lyngba u mawria, u shyiap lum, shyiap um, ki mawblock ha kaba ula shukor iaka ophis treikam ba ula pynioh lut sha ki paidbah, wat haba u khlem ai eiei ruh.

Katkum ka report ba ula phah sha katei ka ophis treikam ula kam ba ka jinglut naka bynta ka jingsupply shyiap um shaki paidbah kala kot 225000/- tyngka, u shyiap lum 42000/-tyngka,u mawria 187000/-tyngka, naka bynta ka jingsupply mawblock pat 571500/- tyngka, hynrei ia kine ki saw jait ki tiar u khlem supply satia.

La lap ruh ba iaki kyrteng jong ki nongioh myntoi ula shu sign hi namar don napdeng ki nongshong shnong kiba don kyrteng haka thup kum ki nongioh myntoi hynrei kim ioh ei ei pat la ka pisa lane ki tiar ruh.

Shuh shuh la lap haka RTI ba ki juh ki briew ruh ki mih artylli ka kyrteng haka thup ki nongioh myntoi, nangta la lap ruh ba wat u briew u bym don ïing ruh ka paiñkhana pat u ioh kumba paw haka list ki nongioh myntoi.

Ha kitei ki snem watla ma nga ruh nga long u dkhot jong katei ka commiitee hynrei u khlem ai jingshai ei ei halor katei ka skhim tad hadien ba nga la ioh jingujor na u paidbah bad nga sa wad iaka jingshisha lyngba ka RTI. Wat iaka signature jong ki katto katne ki dkhot ruh ula shu soi thok kumba paw haka RTI kynthup ruh iaka signature jong nga.

“Ma nga kum uwei na u nongshong shnong jong ka shnong Sohmynting katno nga dap daka jingsngewsih bad jingsngewkhia ban lap ba don kum kine ki nongialam shnong kiba u paidbah baroh shi katto ki ai ka jingshaniah lyngba ka dur jinglong angel jong u, hynrei pynban u long u kruiñ nongbam duh jong ka shnong. Lada ha kane ka rukom shaei ka lawei jong ka roi ka par ka shnong ka thaw kan poi?” ula kylli.