Ka Dorbar ki Khasi Hyndai, Na ka bynta ki class X

Babu Kular Khongjirem

(ba bteng) Ha ka Dorbar, ka sorbar bad ka bishar- khadar ki Khasi hyndai,ym lah ban shu ia rai ne bishar kulmar bad kim ju pdiang hi ruh tang ia ka rai stad bad leh stad jong uwei- arngut kiba leh stad bad rai stad kat ia ka kam u paidbah ba bun balang.

Kiba dei ban don ha ka dorbar ka sorbar bad ka bishar khadar ki long(1)u syiem lang bad kiba khraw bad ki tymmen ki san(2)lada don tang kiba khraw bad ki tymmen ki san (3)tang u syiem bad kiba khraw bad(4)tang kiba khraw ruh biang hi.Hynrei,lada don tang u syiem hi bad ki tymmen ki san(khlem kiba khraw) ne tang ki tymmen ki san ne tang u paid u phew ruh kam lah ne dei ka dorbar.

Ha ka dustur khasi,u syiem u dei tang u nongpyniaid hukum bad ki tymmen ki san pat kidei tang ki nong- iasain ryngkat,ki nong iasneng puramit ryngkat,ki nongia pynsaid-pynthew,ym dei pat ki nongsain ne nongpyniaid ia ki kam ki jam.Dei tang kiba khraw kiba long ki nongpyniaid bad nong pyntyllun ia ki kam ki jam baroh. Ka rukom lum ia ka dorbar: Shwa ban lum ia ka dorbar,u syiem u phah shem ne phah jingtip shwa sha u basan raj(uba khraw uba peit ia ki kam dorbar),u basanraj pat un sa phah pyrta shnong ha u sangot(nongpyrta shnong) ba un leit pyrta shnong bad pyntip sha baroh ki nongshong shnong ban pynlong dorbar ha kata kata ka tarik ha kata kata ka jaka.

Ka rukom sdang bad pyniaid ia ka dorbar pat kalong kumne: Mar ia poi lut kiba khraw bad ki tymmen ki san,u syiem un long u nongpyniaid (chairman) ha ka dorbar bad un plie ia ka dorbar.Un shu ong ‘To ngin ia sdang noh’.U lah ban shu maitphang khyndiat khynsoit ia ka mat jingiakren(agenda).Dei u basan rangbah eh ne u myntri ba long nongialam(chief minister) uban batai bad pynshai bniah ia ka jingthmu jong ka mat jingia kren(agenda), nangta ki sa ia bud pat ter ter ban ia kren ia pyni, ia kaba dei ki ia bat bad ia kaba lait pat ki ia bret bad kyntait sha rud sha kiar.Lada jia pat bym don u syiem(u pang ne leit donkam ki bym lah kiar),u basan rangbah eh un pyniaid bad pynwai ia ka dorbar. Ha ka dorbar,shait don tang katto katne ngut kiba ju kren bad shim bynta ha ka dorbar.Kiba bun hi(majority) na kiba wan dorbar kim ju lait ne nud satia ban kren ha ka dorbar.Ki shu ia byrngem tang na rieh narieh bad na kyndong kynshrot hynrei kim ju nud pynpaw pat ha ka dorbar.

Kum kine ki briew kiba sngew stad tang ha rieh ha rieh khlem nud kren dorbar ki ju sin kum ki ‘ksan rymbei rem dorbar’.Ban long u nongkren dorbar,u nongkren ne nongiasaid pat,udei ban long uba ju tip tymmen bad uba lah ban jer bad pynshisha ia ki kam kiba la ju long ne ju jia ha shnong ha thaw khnang ba un lah ban pynkohnguh ne pynngeit(convince) ia ki nongshong dorbar baroh.U dei ruh ban long uba don jingtip shibun(vast experiences) ia ki jingjia bad jinglong kiwei kiwei ki shnong ne ki hima ne ki ri da kaba ia nujor (compare)shaphang ka jingialong jongki bad pyniahap pat bad kita ki kam na kiwei ki shnong ne ki hima bad ki ri ha shnong ne jaka lajong.Lada u lah ban pynshisha(justify) ia ki nia jong u,kata ka dorbar ka pdiang ia ki nia jong u.(yn dang bteng)