Shah shoh pynmynsaw uwei u samla khasi ha Goraline, Laitumkhrah

Shillong: Ka Khasi Students’ Union mynta ka sngi ka la ioh pdiang ia ka jingujor na uwei u samla Khasi uba la iathuh ba u la shah shoh khlem kano kano ka daw ha ka por 4 baje janmiet ha Goraline, Laitumkhrah.

Katkum ka jingioh lum jingtip, ka jingshah shoh une u samla khasi ka dei tang na ka daw ba u kyntu ia uwei u kharmetor uba pynieng baheh ia la ka thuk thuk hapdeng surok. Une u samla khasi uba niah da ka kali 4 shaka u la kyrpad da ka ktien ba don akor ia uwei u kharmetor ban pynieng sharud ia ka thuk thuk khnang ba un ioh iaid ma u. Pynban utei u kharmetor u la kren khor da kaba ong ‘kya yeh tera baap ka rasta?’. Nalor kata utei u kharmetor u sdang thap kynroi ia utei u samla khasi uba la pynjem bad pyrshang ban iaid noh narud kata ka bike. Hynrei ynda utei u samla u la poi kham haneng khyndiat, kynsan kynsan la wan mih kumba 10 ngut kiba la rah da ki tiar bad khlem kren eiei ki shu bom shu tied beit ia u. Une u samla Khasi u la lait phet da ka said hapdeng ka jingmynsaw na ki bynta jong ka khlieh bad ka met.

Mar ia lait na katei ka jingshah thombor, une u samla u la mareh bran bran sha Laitumkhrah Police Station ban ujor da ka ejahar. Une u samla ynda u la iohi ba ki pulit kim pat kem lut ia kitei ki runar kharmetor, u la thoh ruh sha u Myntri Rangbah ka jylla, u Conrad Sangma ban kyntu ia ki pulit ba kin shimkhia bad trei tyngeh ban ioh kem ia kitei ki kharmetor.

Na ka liang ka KSU mar ia ioh pdiang ia katei ka shithi ka la pynpaw ia ka jingbitar halor ka jingshah thombor ki trai ri trai muluk na ka por sha ka por ha ki bar jylla ki bym khein snep tang khyndiat ruh ia ki trai shnong. Kum kine ki jingjia kim ju jia ha kiwei ki jylla namar ba ki trai jylla kim ju ailad ia ki poiei ba kin leh donbor.

Ki thain ba shong ba sah ki kharmetor kum ka them metor bad ka Goraline ki dei ki jaka ba na ka por sha ka por naduh mynshwa ba ki samla Khasi shynrang bad kynthei ki ju shah pyndik bad shah ktah kti ha ki kharmetor. Ka jingleh ka jong ki kharmetor ka pyni shai ba ki kwah ban ia kynad bad tynjuh bor bad ki Khasi.

Ka KSU halor kane ka mat ka kyntu ia ka tnad pulit ban kem mardor ia baroh 10 ngut bad ia kiwei kiba don kti ban bom klep ia utei u samla Khasi bad ha kajuh ka por ka seng ka maham ba lada ka aiñ kam lah ban leh eiei ha ka por kaba biang, ka KSU ka kloi ban ai ka kti kadiang ka kti ka mon ban leit thwet hi bad pynshitom ia kitei ki kharmetor na Goraline, Laitumkhrah.

Shuh shuh ka seng ka kyntu ia ki paradoh parasnam ban long kiba la khreh lada jia biang kum kine ki jingshah thombor ha ki kharmetor.