Iaid paidbah ki nongialam BJP ha Maharashtra, ban dawa ban plie mardor ia ki temple

Ki dkhot jong ka seng BJP, ki la mih paidbah mynta ka sngi ha Thane District, ha Pahghar District bad ha ka nongbah Pune bad katei ka jing iakhih paidbah, ka dei ban dawa ia ka sorkar Maharashtra, ba kan plie noh ia baroh ki temple, kiba la shah khang sbak, na ka jingjia jong kane ka khlam covid 19.

Shibun ki MLA jong ka seng BJP lem bad kiwei de ki nong kitkam, ki la ia iaid paidbah, ha ryngkat ka jingtied baje, ia tied pliang ha khmat jong ki temple.

Ki MLA jong ka seng BJP, ki kynthup ia U Sanjay Kelkar, Ravindra Chavan, U Ganpat Gaikwad ha ryngkat bad kiwei, ki dei kiba ialam ia katei ka jing iaid paidbah mynta ka sngi.

Ym tang katta, hynrei mynta ka sngi, U Murlidhar Mohol, uba dei u mayor ka Pune, nanga ka Madhuri Misal, ki la pynlong ka jing iaid paidbah ha Pune, ban dawa hi ia katei ka jingplie noh ia ki temple, ha kaba ki pynsngew ba haba ka leit ka wan ka la plie, ki dukan heh ki la plie, kumta ki ki temple ruh ki dei ban plie noh mardor.