Kyrshan ka Synjuk ki Rangbah Shnong Mawhati halor ka jing dawa Block

Nongpoh:Ki nongialam shnong ka thain Maw hati ha Ri Bhoi hapoh ka Synjuk ki Rangbah Shnong Mawhati Area, ki la pynpaw ba ki ai ka jingkyrshan kaba pura halor ka sienjam kaba la shim da ka FKJGP, Mawhati Circle, kiba la dawa na ka sorkar ba ka dei ban wanrah noh ia ka C&RD Block ha Mawhati Constituency.             

Ha ka kyrwoh kaba ki la phah sha ki lad pathaikhubor, ki nongkitkam jong katei ka Synjuk ha ryngkat bad bun ki nongialam shnong na ki shnong bapher bapher katei ka thain, ki la pynpaw ba katei ka sienjam kaba la shim da ka FKJGP, ka long kaba dei eh bad kaba don nongrim, namar ki nongialam shnong kiba hap hapoh ka Mawhati Constituency, ki la shem jingeh shisha ban beh shaduh Umsning Block, na ka bynta ban leit wad ia ki skim pynroi ha shnong ha thaw.

 Ki la kdew ruh, ba ki don shibun ki shnong kiba hap hapoh ka Mawhati Constituency, kiba don shajngai na Umsning Block, ha kaba ki don ki shnong ba ki nongialam shnong ki hap ban iaid ia ka jingjngai da ki spah KM bad kaba la ktah eh ia ka jinglut jingsep jong kiba kum kitei ki nongialam shnong.

   Ban kyrshan ia katei ka sienjam, kaba la ialam da ka FKJGP, katei ak Synjuk ki Rangbah Shnong Mawhati Area, ki la pynskhem ia katei ka jingdawa bad kata ka long ba ki la kyntu ia ka sorkar, khamtam eh ia ki Nongmihkhmat ka Mawhati ba ki dei ban shimkhia ha ka ban iakren, na ka bynta ban pynurlong ia ka C&RD Block ha Mawhati Constituency.