Supreme Court

AIS Suja

Ka Supreme Court badon burom jong kaRi India, ka la ther tyngeh ia ka sorkar India ba mynta hapoh ka jinglalam jong ka BJP, na ki daw ba kane ka sorkar ka la strict palat ia ka jingkhang Lockdown ha baroh kawei ka Ri kat haduh ba ka la hiar ka ioh ka kot ka khaii pateng ha ka Ri.

U paidbah baroh u iohi kumno ba la khang (lockdown) ha ki bnai ba la dep ha kaba ka dang duna bha kane ka Corona Virus, haduh ba ka la shah ktah shisha khamtam ia u kup shiliang sem shiliang u duk u suk bylla ja kpoh bad kumjuh ruh ia ki nongiew nonghat ha kaba la sangeh lut ki kam ki jam khamtam kiba trei business. Kane hi kajuh ka rukom la shah ktah lang imat ha baroh kawei ka Ri India.

Ngi iohi haba kane ka khlam kam pat da jur eh, ka sorkar ka la Lockdown kumba Lockup tang shu mih sha surok ne sha lum la pakdong ia u paidbah bad pynshad kynthih jakoid. Hynrei suki suki pat katba ki ong ka khlam ka la kiew, hynrei phewse la shah pynban ban ia mih da ka deng mask.

Mynta lei ngi iohi ba la nangkiew kata ka khlam hynrei la plie lut ia ki iew ki dukan. U paidbah u sngew phylla namar kane ka long markhongpong. Ki ong katba ka jingpang ka dang duna, te ki lockdown, ynda ki ong ka lah kiew ki shah pynban ia ngi, oh ka pyrthei ki jingkylla. Bad kata ka rukom Lockdown da ka sorkar India hi ka la shah ktah shisha kumba la ong da ka Supreme Court badon burom.

Sa kawei pat, naduh ba sdang kane ka khlam la khang bad iew bad kali bad iingmane. Hynrei mynta pat la plie lad ia ki iew ki hat ka iadie iathied, oh khamtam kata ka leit tyrwa khor ha iing ha iing ba ki ong ha ka phareng home delivery of liquor.

Hynrei ia ki iingmane pat ym pat shah ban plie wat haba la plie lut ia ki dukan ki iew ki hat. Ia ki iingmane la khang naduh hi ba sdang ka Lockdown haduh mynta, to khein katno bnai. Hynrei haba ka NEIFCC ka la kyrpad ban plie noh ia ka iingmane da kaba kyrpad ia u Chief Minister badon burom jong ngi, hynrei ka sorkar ka ong ap shwa namar ba dang saphriang man ka sngi kane ka jingpang Covid-19. Kumta ka jingshah ktah ka la long kumba ong ka Supreme Court badon burom te ka la ktah bha hi kein. Ki iingmane Blei ruh ki la shah ktah lang. Te lada ia ki iew ki hat la plie lut mynta te kan pher aiu ban plie iingmane da kaba bud ia ki protocol?. Lada ia kiei kiei lah plie te tharai kata ka iingmane Blei ba shisien shi taiew da kaba bud ain protocol kan pher aiu mo? To ia trei lem ko sorkar badon burom.