Nang kiew stet ka khlam corona ha India; 77 hajar ngut ha ka shisngi

Ka jingpang khlam Covid-19, ka nang kiew stet bha ha India bad kiba ioh pang ki long 77,266 ngut ha ki 24 kynta ba ladep. Kumta baroh kiba ioh pang khlam covid ha India,ki long 33,87,500 haduh mynta ha India.

Mynta ka India, ka la bun ia ka Brazil ruh ha ka jingdon ki nongpang, kiba dang don ha ka jingpang, kiba long 7,42,043 cases. Kiba iap baroh ki la poi sha ka 61,529, da ka jingdon jong ki 1,057 ngut kiba iap hynnin ka sngi.

Ka Maharashtra, Tamil Nadu bad ka Andhra Pradesh, ki dei ki jylla, kiba don bun tam kiba ioh pang khlam corona virus bad ka jingpang ka nang kiew stet ruh ha Karnataka, Uttar Pradesh bad West Bengal. Ka Maharashtra ka don 14,718 ngut kiba ioh pang thymmai bad sa 355 ngut kiba iap. Baroh kiba ioh pang covid ha katei ka jylla, ki long 7,33,568 bad kiba la jem ki long 5,31,563 bad kiba iap ki long 23,444. Kito kiba dang shah sumar, ki long 1,78,234 ngut, katba kum ka khubor jong ka Health department jong ka Maharashtra.

Ki don haduh mynta 24,605,227 kiba la ioh ia ka jingpang covid ha ka pyrthei baroh kawei bad na kitei ki don 17,075,625 kiba la jem bad sa 834,771ngut kiba iap. Ka US, ka dei ka ri kaba bun tam kiba ioh pang ha ka pyrthei baroh kawei, ha kaba ka don mynta ia 6,046,060 kiba ioh ia katei ka jingpang bad nangta sa ka Brazil, kaba don ia 3,764,493 ngut.