Kwah u Bah Charles Pyngrope ban neh ka Sonia Gandhi kum ka president ka AICC

Shillong: U nongialam jong ka party Congress na kane ka jylla, u Bah Charles Pyngrope u la iathuh ba un leh katba lah ban pynbor ia ka president jong ka All India Congress Committee (AICC), ka Sonia Gandhi ban bteng beit ban nym shongthait na kane ka party.

“Nga don ka jingsngew ba ka Sonia Gandhi kan long beit ka president jong ka AICC haduh mynta. Ngim iohi ba kan don ki daw ba biang ba kan ieh noh na ka shuki president jong ka party,” ong u Bah Charles Pyngrope.

Na ka liang jong u, u la ong ba lada ki khliehduh jong ka party ki sngew ba kan donkam jingkylla ha ki nongialam ba hakhlieh, ki dei ban pynlong da ka election ban jied ia u/ka president ka AICC.

“lada ki jop ha kane ka election, yn pdiang sngewbha beit ia ki ban synshar ia ka party. Tangba ki dei ban long kiba kloi ban iakhun ha ki post ba kham heh ha ka party congress,” u la ong.

Ha kine ki taiew ba ladep, ka Congress Working Committee (CWC), ka committee ba khliehduh ha ka seng congress, ka la sakhi shibun ki jingdkoh haka liang synshar ka congress haduh ba u Ghulam Nabi Azad u la tyrwa ban resign na ka congress.