Sngewsih ki khun bad kiba ha iing ka Kong Skilda Lyngdoh ba shah niew shiliang khmat ha shnong Umran Dairy

Nongpoh: Ki khun ki kti lem bad kiba ha iing ka Kong Skilda Lyngdoh (Bam kwai ha dwar u Blei), kaba la khlad ha ka 23 tarik bad kaba la tep don burom ha ka 25 tarik, ki la pynpaw ia ka jingsngewsih halor ka jingshah niew shiliang khmat hapoh ka shnong Umran Dairy bad kata ka long ba ka shnong kam shym la pyrta shnong ne pyntip paidbah halor ka jingkhlad noh katei ka Longkmie.

Haba iakren bad ki Nongthohkhubor, ki khun jong katei ka Longkmie, ki la ong ba kaei kaba la jia ha ka sngi ba khlad ka kmie jong ki, ka la pynpaw ba ka shnong Umran dairy, ka la pyrshang ban leh kiar na ki, namar haba khlad kiwei kiwei ki briew, ka shnong ka da pyrta shnong, hynrei haba khlad pat hapoh katei ka Longiing, ki bor pyniaid shnong kim shem la pyrta shnong, na ka bynta ban pyntip paidbah.

Kitei ki khun jong katei ka Longkmie kaba la khlad noh, ki la kubur ba ka la don kata ka jingbym ia sngewthuh jingmut hapdeng ki riewngeit na kajuh ka Balang (Presbyterian), hynrei ki la ong pat ba ka shnong kam dei ban shah liang shano shano ruh, namar kum ka shnong hi ka dei ban ieng pdeng bad ka dei ban leh kumba leh kumba leh haba don ki jingjia ba sngewsih ha kiwei pat ki longiing.

Lah ruh ban kdew hangne, ba katei ka Longkmie kaba la khlad noh, ka dei na ka Balang Presbyterian Umran Dairy kaba hap hapoh ka Mawbuh Ri Bhoi Presbytery KJP Synod Sepngi, hynrei kim shym la ioh ban tep don burom hapoh u Lum Jingtep Balang, namar ba ki la shah khanglad ha kawei pat ka Kynhun kaba dei na kajuh ka Balang (Presbyterian) bad kaba la pynlong ia kiba haiing jong katei ka Longkmie, kim banse ban tep noh hapoh ka jaka lajong kaba don ha katei hi ka shnong Umran Dairy.

Ha kawei pat ka liang, ki khun ki kti lem bad kiba haiing jong katei Longkmie ba la khlad, ki la pynpaw ia ka jingsngewnguh ia ki paidbah ka shnong lem bad ia kiwei de, kiba la wan ban sngewlem ha kaba kum katei ka por ba ka iing ka kynduh ia katei ka jingjia ba sngewsih, ha kaba watla ki bor shnong kim shym la pyrta shnong, pynban ki la don bun ki paidbah kiba la leit ban sngewlem.