Troin ka bor u kni bad lyngkar ka shongkha shongman

Kat kum ki khana pateng la pateng u Kni u long kum u shabi ka Kur ka jait ha ka dustur khein kha khein man u Khasi. U Kni u long u nongpeit ia ka iing ka sem ka kur ka jait. U Kni u don ka iktiar kaba khlain ha ka kur ka jait, u don ka bor ban sneng bad hikai ia ki khun ki pyrsa ba dei na kajuh ka kpoh. U don ka iktiar kaba kyrpang ban sneng ban kraw ia ka iing ki hynmen ki para ha ka kur ka jait.

U Kni u ieng kum u diengbah ha ka jingiadei bad ka bha ka miat ki khun ki pyrsa ban ym leh ia kino kino ki kam sniew ban ym pynbyrsih ia ka kur ka jaid. U Kni u don kata ka iktiar ban peit khamtam ha ka shongkha shongman ha ki khun ki pyrsa. Shuwa ka jingwan u phareng bad ka niam Khristan u Kni u dang don ka bor ban pynbeit ia ka khia ka shon ha ka iing ka sem bad ka kur ka jait.

Hynrei naduh ba la wan ka jinghikai ka niam ka iktiar u Kni ka la troin bad ka la shah niew bein kumjuh ia ka dustur ka riti u Khasi. Namar ha ka dustur u Khasi haba don ka jing-ia-teh ktien ha ki khun ki pyrsa u Kni u long kum u kongsan ban pynbeit ia ka kam ka jam ban pyn-ia-teh ktien ban ioh kyntiew kurim jong ki khun ki pyrsa. Hynrei naduh ba la wan ka niam Khristan kaba la hikai ban ym donkam ia ka bor u Kni. Kumta ki pyniathoh shongkurim ki la leh la ka leh khlem da donkam shuh ia ka jingmynjur bad btin lynti jong u Kni. Tang ki kmie ki kpa ka la biang bad ki lah ban pyn-ia-thoh shongkurim ia ki khun ki kti khlem da donkam shuh ia ka rukom ka dustur ban ia tip lang arliang mamla ryngkat bad u Kni. Ka niam ruh ka shah kylluid ban pyn-ia-thoh ia ki arngut khlem ka mon ki kmie ki kpa ruh. Naduh ba la wan u phareng bad u dkhar ka shongkha shongman ka ka la lyngkar lah ban ong.

Balei hap ban ong kumne ka long namar ha kito kiba shonglok (tnga) bad u phareng/dkhar kim da iaid shuh katkum ka dustur ka riti iateh ktien ki arliang mamla, ki la shu ia shong la ka shong bad bud ia ka jinghikai ka niam. Kim donkam ia kren kha ia kren man shuh namar haba u phareng phi tip u shong shaduh sha shiliang sohmyndur (Europe) bad u dkhar hapoh ri India.

Dei kane kein ba nga ong, ka shongkha shongman ka la lyngkar naduh ba la wan u phareng bad u dkhar. Namar kim donkam ban ia teh ktien arliang mamla kumba long ka rukom bad ka dustur ka shongkha shongman ha u Khasi. Kane kein ka la pyntroin ia ka bor ka iktiar jong u Kni ha ka jaitbynriew Hynniewtrep Hynniewskum.
C.B Iawphniaw