Ha U Nailar, na bynta ki jait bynriew Torja, ki sei ia ki met iap bad ki pynphong sopti thymmai

Man la u bnai Nailar, kiba ha iing, ki ju leit sha ki lum jingtep ban sei ia ki met iap jong kiba ieid ba thoin jongki bad hangta kin pynkhuid, kin pynsum pynsaid ia ki met ki phad, kin bujli ia ka synduk iap bad kin pynphong ruh da ki sopti bad kiwei ki jain ki nep bad katei ka dei kaba ki ju leh ha Indonesia.

Katei ka dei kaba ki ju leh ki jait bynriew Torja, ha Panggala, Nort Toraja, South Sulawesi, ha kaba ki pynkhuid, ki niad, ki pynsad ki pyn khyllong bad ki pyndih sikret ruh ia kito kiba ju bang bha ban dih sikret, ha ka por ba ki dang im.

Katei ka jingleh burom, da ki jaitbynriew Toraja, ka dei ka jingrakhe kaba heh tam jongki, ha kaba ki shim ba ka don ka jing iasoh hapdeng uba iap bad uba im.

Kitei ki jaitbynriew, kiba bun ki dei ki khristan, wat la katei ka Ri, ka dei kaba don bun bah ki jaitbynriew Muslim bad la iathuh ba haba kiba ha iing jongki, ki iap, kim ju kyrkieh satia ban leit tep, hynrei ki buh da ki bnai hapoh iing lane ki shna ia ka iing kaba kyrpang, kaba ki khot ‘Tongkonan’ lane ka iing jong u nongiap.

Ha kitei ki sngi, la iathuh ba kiba ha iing, ki ju kren ju khana ia utei uba iap bad ki ju khat ja ne theh sha lang ruh, ha ka por ba ki ia bam kiba dang im, kiba don ha katei ka iing.

U nongialam jong katei ka kynhun ki jaitbynriew Torajan, U Eric Crystal Rante Allo, u iathuh ba ia kiwei ki bym ju mlien, ka dei ka kam khyllah, hynrei ha ki, ki shim ba kiba iap, ki don hi hapdeng jongki, ki shong ju sah lang bad ki peit ruh ha ka trei ka ktah bad ka leit ka wan ba man ka sngi jongki.