Ka thma poh iing, ha ka seng Congress

Bah Monarch Shabong

Ha ki khyndiat sngi ba ladep, ka la khie ka thma poh iing ha ka seng Congress, ka seng sain pyrthei kaba rim tam ha India bad ka daw, ka long ba ki don 23 ngut ki nong ialam jong ka seng, kiba kwah ban ioh noh ia u nongialam ba pura, u ban kit ban bah ia katei ka seng, kaba don ha ka jing shong synjor kaba khraw la 6 snem eiei.

Ka Congress, kam dei shuh ka seng kaba rit, hynrei ka kyrteng jongka, ka la sawa ha kylleng ki kyndong kynshrot jong ka Ri India bad wat ha satlak ka pyrthei bad kum ka seng sain pyrthei, kaba rim tam jong ka Ri, ki la don shibun kiba ieid bad sa shibun bah kiba ijli ruh. Haduh ha kine ki sngi, la ialam ia katei ka seng, da ka Sonia Gandhi, hadien ba U Rahul Gandhi, u khun rangbah jongka, ula iehnoh ia ka kam nongialam, hadien, ba um shym la lah ban pynjop don burom ia ka seng Congress, ha ki ar tylli ki elekshon 2014 bad 2019 bad kumta, ki nongialam jong katei ka seng, ki dei ban pdiang hun, ia ka mon jong u khun ka iing ki Gandhi.

Na ka liang jong ka Sonia Gandhi, ruh, ngi la iohi, ba ka la long shisha ka nongialam kaba lah, kaba iai, ha kaba ka la wan rah arsien kynthih ia ka sorkar Congress, ha ryngkat bad U Manmohan Singh; hynrei kato ka juk jong u 2004-2009, ka la iaid bad kumta, ka Congress, ka donkam da kiwei pat ki nongialam kiba thymmai.

Ki don ruh shibun ki jing sngewthuh bakla, ha ka kynhun ki nongialam Congress, ba kiba dei ban shimti ia ka shuki President jong ka parti, ka dei tang ia ka iing jong ki Gandhi; hynrei katei ka dei ka jing pyrkhat kaba bakla bad katei ka jing pyrkhat ka dei ruh, kaba nang pyntroin pynban ia ka Congress ha kine ki sngi bad ka jingshisha hi ka long ba ki la don bun bah kiba ialam ia ka Congress, ki bym dei satia na ka iing ki Gandhi bad ka histori, ka kren shai ia kata ka phang.

Ha ka synshar paidbah, ka donkam ka liang synshar kaba khlain lane kaba lah ban treikam bad nangta ka liang pyrshah ruh, kaba tip bad kaba iohi lut ia ki jingdkoh jong ka synshar khadar bad ka India, ka donkam ia ka Congress, kumba ka donkam ia ka BJP bad kumta, na ka bynta ka dor bad ka bor jong ka synshar paidbah, ka la dei ia ka Congress, ba kan khreh kyrkieh ialade, na bynta ki elekshon ha Bihar, West Bengal, Assam nalor kiwei pat ki ban sa nang wan.