Kyntait u riewsaid ba rangbah ka Supreme Court, ban pan map na ki nongbishar

U Prashant Bhushan, u riewsaid ba la rangbah jong ka Supreme Court, ula kren shai mynta ka sngi, ba u kyntait ban pan map ha ka jing dawa ki nong bishar jong ka Supreme Court, halor ki ar tylli ki tweet jongu, namar ba u ong ba ki jingkren jongu, kin iai long, kiba don ia kajuh ka jingmut. “Kano kano ka jing pan map, pyndep rukom, kan long pyrshah ia ka jing ia tip lem jongnga bad kumjuh ia ka iing bishar” ong U Bhushan, haba phah ia ka jubab jongu sha ka Supreme Court mynta ka sngi.

U Bhushan, u ong “Ki tweet jongnga, kin iai long kiba ngan iai bat ia ka jingmut kabadon ha ki. Ki jingkren jongnga, kin long kum ka jingsngew jongnga, kum u nongshong shnong bad kum u ophisar jong ka kashari. Kumta ka jing pan map, namar ba nga kren ia kine lada ki long kiba don jingteh ne ki bym don jingteh ruh, kin long ki bym iahap satia” ula ong shuh shuh.

Ha ka 20tarik mynta u bnai, ka Supreme Court, ka ai por ia U Bhushan, haduh ka 24tarik Nailar 2020, ba un pyrkhat bha bad ba un pan map na bynta ki jingkren jongu. Na ka liang U Bhushan, u dawa ba ia ka jing shah pynshitom jongu, dei ban aiti, ba kan bishar, da kawei pat ka thup jong ki nongbishar.